Naskah Khutbah Jumat BAHASA JAWA Dewan Dakwah BantulEdisi 043/Tahun II/2022
Ingin mendapatkan materi Khutbah Jumat?
🟢 Group WhatsApp 4️⃣ : https://chat.whatsapp.com/HuyMTmy9wVn2vdG1HRQMSw
🔵 Naskah lengkap dari awal bisa dibuka di Channel Telegram : https://t.me/khutbah_DDII_Bantul
💻 Naskah lengkap dari awal : https://drive.google.com/drive/folders/11ZcffhlMqe-KdNXEshz1UUOhQ4Ik132l?usp=sharing
NGUPADI WIRANOM KANG PINILIH
Dening : Ust. Muslih Abdul Karim
Khutbah I
اَلْحَمْدُ للهِ رَبِّ اْلعَالَمِيْن، وَالعَاقِبَةُ لِلْمُتَّقِيْنَ، وَلاَ عُدْوَانَ إِلاَّ عَلَى الظَّالِمِيْنَ، وَأَشْهَدُ أَنْ لاَ إِلَهَ إِلاَّ اللهُ وَحْدَهُ لاَ شَرِيْكَ لَهُ وَأَشْهَدُ أَنَّ مُحَمَّدًا عَبْدُهُ وَرَسُوْلُهُ. اَللَّهُمَّ صَلِّ وَسَلِّمْ عَلَى نَبِيِّنَا مُحَمَّدٍ وَعَلَى آلِهِ وَصَحْبِهِ وَمَنْ تَبِعَهُمْ بِإِحْسَانٍ إِلَى يَوْمِ الَّدِيْنَ ِ
أَمَّا بَعْدُ؛ عِبَادَ اللهِ، أُوْصِيْكُمْ وَإِيَّايَ بِتَقْوَى اللهِ، فَاتَّقُوا اللهَ حَقَّ تُقَاتِهِ وَلاَ تَمُوْتُنَّ إِلاَّ وَأَنتُمْ مُّسْلِمُوْنَ .يَا أَيُّهاَ الَّذِيْنَ ءَامَنُوا اتَّقُوا اللهَ حَقَّ تُقَاتِهِ وَلاَ تَمُوْتُنَّ إِلاَّ وَأَنتُمْ مُّسْلِمُوْنَ.
قَالَ اللهُ تَعَالَى: نَحْنُ نَقُصُّ عَلَيْكَ نَبَأَهُم بِالْحَقِّ إِنَّهُمْ فِتْيَةٌ آمَنُوا بِرَبِّهِمْ وَزِدْنَاهُمْ هُدًى
Ma’asyiral muslimin rahimakumullah
Dinten menika 28 Oktober, minangka dinten ingkang wigatos tumrap bangsa Indonesia jalaran wonten prastawa “Sumpah Pemuda” ingkang nalika taun 1928 dados tetenger mawujudipun tekad nyawiji lan manunggaling bangsa. Para pangarsaning pemuda saben daerah nyingkiraken sakathahing raos fanatisme (gumedhe) saking asal usulipun, sedaya menika namung kangge nggayuh tujuan ingkang langkung ageng inggih menika kamardhikan lan madegipun negari ing nuswantara.
Sedaya sami nyawiji kanthi janji ingkang karantam ing tetembungan ingkang ndamel gumeter ing dada: janji nyawiji kanthi negari, bangsa lan basa: Indonesia. Lan awit saking paringipun berkah lan rahmat Allah SWT, pramila pitulas (17) taun candhakipun negari kita menika saget mardhika
Kita perlu emut, bilih saderengipun prastawa “detik-detik proklamasi” dumados; kacathet ing sejarah wontenipun para pemuda kados pundi sami mandhegani amrih proklamasi kamardhikan negari menika saget enggal dipun tindak-aken. Lumantar drama penculikan dhumateng Bung Karno lan Bung Hatta sahingga dipun kenal minangka “Peristiwa Rengasdengklok” ing tanggal 16 Agustus 1945, para pemuda nuntut amrih enggal dipun leksana-aken proklamasi. Pramila ing dinten Jumat, 17 Agustus 1945 jam 10.00 enjang, saget ngumandhang proklamasi kamardhikan negari Republik Indonesia.
Mekaten ugi ing masa pasca kamardhikan, kiprahipun pemuda dados penggerak lan pembaharuan mental bangsa. Taun 1966 lahir gerakan KAMI/ KAPPI ingkang meksa pemerintah kanti “Tiga Tuntutan Rakyat” (Tritura), inggih menika: 1) Pembubaran PKI kaliyan ormas-ormasipun, 2) Pembubaran kabinet Dwikora lan 3) Mandhapaken reregan pangan.
Salajengipun ing masa reformasi taun 1998 ugi kathah dipun pandhegani dening kiprahipun para pemuda lan mahasiswa, miangka pertandha lengseripun panguwaos Preseiden Soeharto ingkang sampun lumampah 32 taun.
Wekdal taksih mudha hakikatipun minangka tahapan rikala para “generasi penerus” bakal dados gegadhanganipun bangsa ing wekdal badhe dhateng. Ing astanipun gumantung nasib bangsa. Syeikh Musthofa Al-Ghoyalani ngendika:
إِنَّ فِيْ يَدِ الشُّبَّانِ أَمْرَ الْأُمَّةِ وَفِيْ أَقْدَامِهَا حَيَاتَهَا
“Satemene ing tangane pemuda dumunung urusane umat, lan ing sikile pemuda uga gumantung uripe umat”.
Perkawis menika nedahaken bilih sae lan awonipun satunggaling masyarakat, bangsa lan negari gumantung ing para pemudanipun.
Ma’asyiral muslimin rahimakumullah
Sahabat Ibnu Abbas r.a. ngendika:
مَا بَعَثَ اللهُ نَبِياً إِلَّا شَابّاً ، وَلاَ أُوْتِيَ اْلعِلْمَ عَالِمٌ إِلاَّ وَهُوَ شَابٌّ
”Allah ora ngutus sawijining Nabi kejaba dheweke iku minangka pemuda. Lan ora ono sawijinig ulama kang pinaringan ngelmu kejaba dheweke minangka pemuda.” [Riwayat Ibnu Abi Hatim)
Sejarah sampun kathah paring bukti. Para nabi ingkang dipun utus paring piwucal iman tauhid nalika taksih anem, wiwit Nabi Ibrahim a.s ngadhepi raja Namrudz; mekaten ugi Nabi Musa a.s. ngadhepi Fir’aun.
Pemuda ing salebeting sejarah nggadhahi kathah sumbangsih lan dados “agen perubahan”. Para sahabat Nabi Muhammad saw kathah saking kalangan pemuda. Duta Islam ingkang sepisanan kangge ing kutha Madinah ugi satunggaling pemuda, inggih menika Mush’ab bin Umair. Lare anem ingkang setya lan wantun nggantos kalenggahanipun kanjeng nabi ing papan sare nalika nindak-aken hijrah ugi pemuda, inggih Ali bin Abi Thalib.
Panglima perang ingkang dipun pilih kanjeng Nabi SAW kangge ngadhepi Byzantium (Romawi) ugi pemuda ingkang nembe umur 18 taun, Usamah bin Zaid, lan kasil unggul ngadhepi mengsahipun. Dene “pembebas Konstantinopel” ing salebeting perang ngadhepi Kekaisaran Romawi ugi satunggaling pemuda, inggih menika Mohammad al Fatih umur 20 taun.
Ing salebeting Al-Qur’an, Allah SWT nyerat patuladhan ingkang sae wontenipun pemuda minangka lambang kemajuan, “agen perubahan” lan “kebangkitan umat”:
نَحْنُ نَقُصُّ عَلَيْكَ نَبَأَهُم بِالْحَقِّ إِنَّهُمْ فِتْيَةٌ آمَنُوا بِرَبِّهِمْ وَزِدْنَاهُمْ هُدًى
”Ingsun crita-ake ing siro (Muhammad) kanthi sabanere. Satemene wong-wong iku para pemuda kang iman marang Pangerane, lan Ingsun paring tambah pituduh uga ing dheweke.” (QS al-Kahfi: 13).Tiyang menika minangka sarombongan wiranem ingkang jumlahipun pitu lan nggadhahi kaluwihan ing bab kapribaden lan iman, mbudidaya nglawan ngadhepi sawernaning wujud kemungkaran lan tumindak nalisir inng masyarakat. Para wiranem menika dipun kenal minangka Ashabul Kahfi (ingkang mapan ing guwa).
Menawi kita kepengin mangertos kados pundi nasib ing wekdal badhe shateng ing satunggaling bangsa, pramila kita saget ningali kados pundi kahananipun para pemuda (wiranem) ing dinten menika. Baba menika jumbuh kaliyan setunggaling pangendikan winasis ingkang wicaksana:
شُبَّانُ الْيَوْمِ رِجَالُ الْغَدِ
“Pemuda ing dina iki minangka pemimpin ing dina sesuk”
Ma’asyiral muslimin rahimakumullah
Sasampunipun kanthi pawitan iman, pramila perkawis sanes ingkang kedah dipun gadhahi dening pemuda inggih menika “ilmu pengetahuan lan teknologi.”
Imam Syafi’i, nate ngendika ing salebeting sya’ir:
حَيَاةُ الْفَتَى وَاللهِ بِالْعِلْمِ وَالتُّقَى ۞ إِذَا لَمْ يَكُوْنَا لاَ إِعْتِبَارَ لِذَاتِهِ
“Demi Allah, uripe wong enom kudu kanthi ilmu lan takwa. Menawa sakelorone ora ono, mangka jatidhirine ora ono regane”
Ing antawisipun bab ingkang ndamel ajining para wiranem inggih menika wekdal, ingkang kanthi mekaten piyambakipun saget pados ngelmu, pengalaman gesang lan kesuksesan. Wekdal ingkang longgar menawi mboten dipun agem kangge ngupadi salah saweneh saking tigang perkawis menika namung bakal dados bagianipun setan kangge nggodha lan jrumusaken ing tumindak dosa lan lampah sasar.
Imam Asy-Syafi’i rahimahullah ngendika,
وَالنَّفْسُ إِنْ لَمْ تُشْغِلْهَا بِالْحَقِّ شَغَلَتْكَ بِالْبَاطِلِ
“Demi jiwane manungsa, yen sira orang nggawe repot ing perkara kang hak (bener), mangka sira bakal repot ing urusan kang bathil (luput)”
Ma’asyiral muslimin rahimakumullah
Kita samenika gesang ing alam kamardhikan. Nanging mboten ateges sampun mboten wonten tantangan lan sepi saking perjuangan. Malah ing zaman menika tantanganipun sanget ageng. Kita mboten sacara langsung ngadhepi menngsah nyata ingkang awujud badan wadag, nanging ing salebeting wujud sanes ingkang saget mbebayani ing kapribadhenipun pemuda lan ngakibataken bakal surutipun nasib bangsa lan negari.
Tantangan ingkang ketingal lan cetha ing salebeting jaman menika, khususipun tumrap para wiranem (pemuda) inggih menika:
Tantangan Sepisan, wontenipun pesrawungan remaja ingkang tebih saking piwucaling syariat agami. Kathah para remaja umumipun sami “pacaran”; wonten ugi ingkang remen nglithih – keluyuran ndalu, sobo ing papan hiburan. Emanipun, bab ingkang estu salah kaprah menika sampun dipun anggep perkawis ‘lumrah’. Wonten malih ingkang gantos kejrumus ing tumindak nalisir sanesipun ingkang langkung miris, inggih ‘seks pranikah’, miras lan narkoba.
Dene wonten saperangan pemuda ingkang sregep dhatengi masjid utawi mlampah ing majelis ta’lim justru dipun anggep “sok alim”, munafik, dipun anggep wonten pamrih sanes, istilahipun pamer, pansos lan sanesipun.
Tantangan kaping kalih, Gaya hidup lan dunia hiburan (entertainment). Kathah lare anem ingkang gampil niru-niru cara ngagem pakaian ingkang aneh, nyentrik lan dipun anggep trendy. Kamangka mboten selaras tumrap syariat agami. Lare mekaten dados generasi “beo” (ela-elu), lan kepingin kados dene tiyang sanes, remen pamer supados dianggep supel grapyak pesrawunganipun, lan mboten kuno “mati gaya.”
Mawerni-werni jinis hiburan tuwuh ing masyarakat, wiwit jagading ‘game online’ dumugi tontonan seni panggung. Wonten laporan survey bilih dumugi 90% tayangan hiburan ing masyarakat menika mboten wonten suraosipun kagem paring piwucal kangge ngukir (mbentuk) watak wantunipun para putra wayah (minangka generasi ‘berkarakter’).
Kita saget nyawang kanan-kiring bilih kathah lare alit samenika langkung apal ing syair lagunipun tiyang diwasa, cara gunemanipun lan niru-niru solah bawanipun tiyang diwasa kamangka dereng cekap umuripun. Lare anem samenika langkung apal ing naminipun para artis lan ‘lelakon’ cerita sinetron tinimbang tokoh pejuang agami Islam, piwucal agami lan ayat Al-Qur’an utawi Hadits.
Ma’asyiral muslimin rahimakumullah
Tantangan kaping tiga, Kemajuan teknologi informasi. Teknologi minangka sarana tumrap umat manungsa kangge ndamel gampil sawernaning kabetahan gesang. Sahingga, minangka sarana (piranti) saget dipun gina-aken ing werni kalih: inggih tumindak kesaenan utawi piawon. Kados wonten pepatah “the man behind the gun”. Ingkang ateges, sae lan awonipun pigunaning piranti gumatung ing niyat lan sedyanipun ingkang ngagem. Teknologi saget dipun agem ing mawerni lampah nalisir lan awon, nanging ing astanipun tiyang iman saget dipun agem ninangka sarana dakwah, bisnis lan syiar ilmu agama utawi sedaya perkawis ingkang manfaat.
Ma’asyiral muslimin rahimakumullah
Mekaten kathah tantangan utawi bebaya ingkang dipun adhepi para wiranem ing jaman menika. Saestu, kiprahipun pemuda minangka pitulung ingkang nylametaken ‘masa depan’ bangsa badhe saget kagayuh menwawi dipun labara syarat werni kalih: takwa lan ngelmu. Para wiranem saestu dados pahlawan, panulung lan pelopor ingkang tansah dipun antu-antu para kasepuhan.
Perkawis menika jumbuh kados ingkang dipun ngendika-aken kanjeng Nabi Isa as nalika nimbali para sahabat ingkang sinebat pemuda “Hawariyun” ingkang tansah setya tuhu lan sumadhiya mbelani piwucal agami tauhid:
يَا أَيُّهَا الَّذِينَ آَمَنُوا كُونوا أَنصَارَ اللَّهِ كَمَا قَالَ عِيسَى ابْنُ مَرْيَمَ لِلْحَوَارِيِّينَ مَنْ أَنصَارِي إِلَى اللَّهِ قَالَ الْحَوَارِيُّونَ نَحْنُ أَنصَارُ اللَّهِ فَآَمَنَت طَّائِفَةٌ مِّن بَنِي إِسْرَائِيلَ وَكَفَرَت طَّائِفَةٌ فَأَيَّدْنَا الَّذِينَ آَمَنُوا عَلَى عَدُوِّهِمْ فَأَصْبَحُوا ظَاهِرِينَ ﴿١٤﴾
“He wong kang padha iman, sira padha dadi-o panulung (agamane) Allah kayadene Isa bin Maryam wis nimbali ing para pendhereke yang tuhu setya: “Sapa sira kang bakal dadi panulungku (kangge mbelani agamane) Allah. para pandhereke kang setya iku matur: Kita sedaya menika dados panulungipun (mbelani) agami Allah, banjur saperangan sangka Bani Israil iman lan saperangan liyane kafir; mangka Ingsun paring daya kekuatan marang wong kang iman kanggo ngadhepi mungsuhe, banjur padha antuk kamenangan.” (Qs. As Shaf: 14)
Ma’asyiral muslimin rahimakumullah
Lumantar ing mimbar khutbah menika, kawula minangka khatib ngajak lan nyuwun priksa: Sinten ing antawisipun pemuda mriki ingkang bakal sagah utawi siap majeng minangka pemimpin, panulung lan nylametaken masa depan negari kita menika? Menapa wonten ingkang siap sumadhiya lan wantun nampi tantangan menika?
Mekaten atur khutbah siang menika mugi manfaat. Amiin.
بَارَكَ الله لِيْ وَلَكُمْ فِي الْقُرْآنِ الْكَرِيْمِ، وَنَفَعَنِيْ وَإِيَّاكُمْ بِمَا فِيْهِ مِنَ الْآيَاتِ وَالذِّكْرِ الْحَكِيْمِ. أَقُوْلُ قَوْلِيْ هذا وَأَسْتَغْفِرُ اللهَ لِيْ وَلَكُمْ
Khutbah II
الْحَمْدُ لِلّٰهِ رَبِّ الْعَالَمِيْنَ، وَبِهِ نَسْتَعِيْنُ عَلَى أُمُوْرِ الدُّنْيَا وَالدِّيْنِ،
أَشْهَدُ أَنْ لاَ إِلَهَ إِلاَّ اللهُ وَحْدَهُ لاَ شَرِيْكَ لَهُ وَأَشْهَدُ أَنَّ مُحَمِّدًا عَبْدُهُ وَرَسُوْلُهُ،
اَللَّهُمَّ صَلِّ وَسَلِّمْ عَلَى نَبِيِّنَا مُحَمَّدٍ وَعَلَى آلِهِ وَصَحْبِهِ وَمَنْ تَبِعَهُمْ بِإِحْسَانٍ إِلَى يَوْمِ الدِّيْنِ
أَمَّا بَعْدُ؛ عِبَادَ اللهِ، أُوْصِيْكُمْ وَإِيَّايَ بِتَقْوَى اللهِ، فَاتَّقُوا اللهَ حَقَّ تُقَاتِهِ وَلاَ تَمُوْتُنَّ إِلاَّ وَأَنتُمْ مُّسْلِمُوْنَ
إِنَّ اللهَ وَمَلاَئِكَتَهُ يُصَلُّوْنَ عَلَى النَّبِيِّ يَا أَيُّهَا الَّذِيْنَ آمَنُوْا صَلُّوْا عَلَيْهِ وَسَلِّمُوْا تَسْلِيْمًا.
اللَّهُمَّ صَلِّ عَلَى مُحَمَّدٍ وَعَلَى آلِ مُحَمَّدٍ، كَمَا صَلَّيْتَ عَلَى إِبْرَاهِيْمَ وَعَلَى آلِ إِبْرَاهِيْمَ، وَبَارِكْ عَلَى مُحَمَّدٍ وَعَلَى آلِ مُحَمَّدٍ، كَمَا بَارَكْتَ عَلَى إِبْرَاهِيْمَ وَعَلَى آلِ إِبْرَاهِيْمَ، فِي العَالَمِيْنَ إِنَّكَ حَمِيْدٌ مَجِيْدٌ،
اللَّهُمَّ اغْفِرْ لِلْمُؤْمِنِيْنَ وَالْمُؤْمِنَاتِ، وَالْمُسْلِمِيْنَ وَالْمُسْلِمَاتِ، الأَحْيَاءِ مِنْهُمْ وَالأَمْوَاتِ، إِنَّكَ سَمِيْعٌ قَرِيْبٌ مُجِيْبُ الدُّعَاءِ.
اللَّهُمَّ إِنَّا نَسْأَلُكَ الْهُدَى وَالتُّقَى وَالعَفَافَ وَالغِنَى.
اَللَّهُمَّ أَصْلِحْ لَنَا دِيننَا اَلَّذِي هُوَ عِصْمَةُ أَمْرِنَا وَأَصْلِحْ لَنَا دُنْيَا نَا اَلَّتِي فِيهَا مَعَاشنَا وَأَصْلِحْ لَنَا آخِرَتَنَا اَلَّتِي إِلَيْهَا مَعَادنَا وَاجْعَلْ اَلْحَيَاةَ زِيَادَةً لَنَا فِي كُلِّ خَيْرٍ وَاجْعَلْ اَلْمَوْتَ رَاحَةً لَنَا مِنْ كُلِّ شَرٍّ.
رَبَّنَا ظَلَمْنَا أَنْفُسَنَا وَإِنْ لَمْ تَغْفِرْ لَنَا وَتَرْحَمْنَا لَنَكُوْنَنَّ مِنَ الخَاسِرِيْنَ.
رَبَّنَا آتِنَا في الدُّنْيَا حَسَنَةً وَفي الآخِرَةِ حَسَنَةً وَقِنَا عَذَابَ النَّارِ.