Naskah Khutbah Jumat BAHASA JAWA Dewan Dakwah BantulEdisi 023/Tahun III/2023
Ingin mendapatkan materi Khutbah Jumat?
🟢 Group WhatsApp 2️⃣ : https://chat.whatsapp.com/JwOZ6ZelLUx5BTam0cYhFn
🔵 Naskah lengkap dari awal bisa dibuka di Channel Telegram : https://t.me/khutbah_DDII_Bantul
HAKEKAT GEGAYUHANING URIP SEJATI
Dening: Ust. Khomsul Latifin, S.Ag., MSI
Khutbah I
إِنَّ الْحَمْدَ لِلَّهِ نَحْمَدُهُ وَنَسْتَعِيْنُهُ وَنَسْتَغْفِرُهُ وَنَتُوْبُ إِلَيْهِ، وَنَعُوْذُ بِاللهِ مِنْ شُرُوْرِ أَنْفُسِنَا وَسَيِّئَاتِ أَعْمَالِنَا، مَنْ يَهْدِهِ اللهُ فَلَا مُضِلَّ لَهُ وَمَنْ يُضْلِلْ فَلَا هَادِيَ لَهُ.
وَأَشْهَدُ أَنْ لَا إِلَهَ إِلَّا اللهُ وَحْدَهُ لَا شَرِيْكَ لَهُ، وَأَشْهَدُ أَنَّ مُحمَّداً عَبْدُهُ وَرَسُوْلُهُ.
اَللهُمّ صَلّ وَسَلّمْ عَلى سيّدنا مُحَمّدٍ وَعَلى آلِهِ وِأَصْحَابِهِ وَمَنْ تَبِعَهُمْ بِإِحْسَانٍ إِلَى يَوْمِ الدّيْن
عِبَادَ اللهِ أُوْصِيْكُمْ وَإِيَّايَ بِتَقْوَى اللهِ فَقَدْ فَازَ الْمُتَّقُوْنَ
يَاأَيُّهَا الَّذِينَ آمَنُوا اتَّقُوا اللَّهَ حَقَّ تُقَاتِهِ وَلَا تَمُوتُنَّ إِلَّا وَأَنْتُمْ مُسْلِمُونَ
قال الله تعالى: وَلِكُلٍّ وِجْهَةٌ هُوَ مُوَلِّيهَا فَاسْتَبِقُواْ الْخَيْرَاتِ أَيْنَ مَا تَكُونُواْ يَأْتِ بِكُمُ اللّهُ جَمِيعاً إِنَّ اللّهَ عَلَى كُلِّ شَيْءٍ قَدِيرٌ ﴿١٤٨﴾
Ma’asyiral Muslimin rahimakumullah.
Alhamdulillahi rabbil ‘alamin, puji syukur kita konjukaken dhumateng Allah SWT ingkang sampun paring tumrap kita kathah kenikmatan, sae ingkang awujud kesarasan, umur panjang saha ketetapan iman islam. Mugi-mugi kangrahan menika saget ndamel kita ngaturaken syukur panuwun ingkang saleres-leresipun.
Shalawat lan salam mugi-mugi tetep kaparingna dhumateng Kanjeng Nabi MuhammadSAW, kaliyan kulawarga, para sahabat lan sedaya umatipun ngantos akhir ing jaman. Panjenenganipun ingkang sampun ngasto piwucal Islam lan mbimbing kita sedaya medal saking pepeteng gesang tumuju cahya ingkang padang njinggrang.
Minangka khatib, mboten kesupen keparenga kawula ngemutaken dhumateng para sedherek sedaya, linangkung tumrap awak kula piyambak, sumangga kita ntansah nambah raos iman lan takwa dhumateng Allah kanthi saleres-leresipun takwa inggih kanthi nindaki dhawuhing agami saha ngajeng-ajeng ridho utawi ganjaran saking Allah. lajeng nilaraken awisanipun Allah kanthi kebak raos ajrih dhumateng adzab ipun Allah ing donya menika utawi ing akhirat mangke.
Ma’asyiral Muslimin rahimakumullah.
Kita umat manungsa dipun cipta gesang ing donya menika saestunipun nggadhahi tujuan ingkang agung sanget; mboten namung kangge nedha, ngunjuk, tilem, lan midhereki karemenan manah utawi hawa nafsu kemawon. Sampun ngantos gadhah panginten kita menika dipun cipta gesang tanpa tujuan ingkang gumathok, lajeng angsal kangge tumindak sakajengipun piambak. Allah swt ‘ngoreksi’ anggepan saperangan tiyang ingkang mekaten:
أَفَحَسِبْتُمْ أَنَّمَا خَلَقْنَاكُمْ عَبَثاً وَأَنَّكُمْ إِلَيْنَا لَا تُرْجَعُونَ
“Mula apa sira padha duwe pangira, yen sejatine Ingsun Allah wis nyipta ing sira kabeh among kanggo dedolanan wae, lan sira padha ngira yen ora bakal dibalek-ake sowan ing ngersaning Sun (Allah) ?” (Qs. Al-Mu’minun: 115)
Tujuan gesang kita menika nggadhahi maksud ingkang ageng, kados Allah swt sampun paring dhawuh ing kita:
وَمَا خَلَقۡتُ ٱلۡجِنَّ وَٱلۡإِنسَ إِلَّا لِيَعۡبُدُونِ
“Ingsun Allah ora nyipta-ake jin lan manungsa, kejaba mung supaya padha ngibadah (ngumawula) ing ngersaning Sun Allah” (Qs. Adz-Dzariyat: 56).
Ibnu Adil Bar nafsiraken makna liya’budun (لِيَعۡبُدُونِ) inggih menika liyuqirru bil-‘ubudiyah dhau’an au karhan (usaha ingkang ajeg – tekun nglampahi ngibadah ing kawontenan bingah utawi sisah). Kadhang-kadhang pancen ngibadah wonten ingkang kita remeni utawi mboten, lan menika kita dipun ndhawuhaken supados tansah njagi saget istiqomah (ajeg).
Ma’asyiral Muslimin rahimakumullah.
Salajengipun, salebeting ngibadah menika kita mboten namung nglampahi ngibadah ingkang awujud ritual (amalan) sholat, siyam utawi tindak haji; ananging lampah ngibadah ingkang wiyar lan lumebet ing pinten-pinten perkawis gesang.
Allah medharaken kados pundi jejer kalenggahan umat manungsa ing Qs. al baqarah 30″
وَإِذْ قَالَ رَبُّكَ لِلْمَلَائِكَةِ إِنِّي جَاعِلٌ فِي الْأَرْضِ خَلِيفَةً
“lan mangertia, nalikane Allah pangeranira ngendika ing para malaikat: Satemene Ingsun Allah bakal ndadekake sawijining khalifah ing bumi”
Sarining piwucal saking ayat menika : minangka maklumat utawi pawartos ing perkawis dipun angkatipun manungsa dening Allah dados khalifah utawi wakil ing saklumahing bumi (ndonya); inggih menika manungsa katetepaken dados wakilipun Allah kangge ngrumat, nggulawenthah lan ngatur lelampahaning praja panggesangan ing panggung donya menika. Perkawis menika dipun maksudaken supados saget ndamel panggesangan ingkang majeng, tumata, harmonis, ayem tentrem lan kebak karaharjan, saha saget nggayuh kabegjan gesang ing donya ngantos akhirat.
Ma’asyiral Muslimin rahimakumullah.
Jumbuh kaliyan jejer kalenggahan, tugas lan kuwajibaning umat manungsa ing ndonya menika pramila Gusti Allah paring pitedah awujud piwucal agami lumantar para rasul utusaninpun minangka dados rahmat kangge saisining alam ndonya.
Ing saklebeting pangibadahan menika kita dipun dhawuhaken bilih saben nindak-aken amalan tansah dipun awiti kanthi nyebat asmanipun Allah ingkang kawastanan waosan “basmalah”; menika minangka pratandha midherek lan pangibadahipun dhumateng Allah. Menika saestunipun ingkang dipun wastani manungsa minangka khalifah ing jagad menika. Saking Abu Hurairah r.a., Rasulullah SAW ngendika:
كُلُّ أَمْرٍ ذِيْ بَالٍ لاَ يُبْدَأُ فِيْهِ بِـ : بِسْمِ اللهِ الرَّحْمنِ الرَّحِيْمِ فَهُوَ أَبْتَرُ
“Saben perkara wigati kang ora diawiti kanthi ‘bismillahirrahmanir rahiim’, amalan ikut pedhot (barokahe).” (HR. Al-Khatib ing kitab Al-Jami’). Maksudipun mboten nggadhahi aji utawi piguna ing ngersanipun Allah.Ringkesipun, ing saklebeting gesangipun toyang muslim supados sedaya amal tumindak menika katindakaaken saget dados-a srana kangge ngumawula dhumateng Allah; kadosdene ingkang sampun kadhawuhaken ing al-Qur’an:
قُلْ إِنَّ صَلاَتِي وَنُسُكِي وَمَحْيَايَ وَمَمَاتِي لِلّهِ رَبِّ الْعَالَمِينَ
“Ucapno: Saestunipun shalat kula, ibadah kuls, gesang kula lan pejah kula namung kagem pados ridhanipun Allah, Gusti ingkang mangerani sedaya alam”, (Qs. Al-An’am: 162)
Inggih menika gegayuhaning gesang manungsa ingkang sejati. Kita minangka manungsa gesang ing ndonya menika kedah nggadhahi gegayuhan ingkang cetha,
Inilah tujuan hidup manusia yang sebenarnya. Kita sebagai manusia hidup di dunia ini harus mempunyai tujuan yang jelas, tegas, mantep lan konjem. Ing jaman menika tujuan gesang mekaten dipun westani “visi lan misi” gesang. Visi inggih menika panjangka (gegayuhan) ideal ing masa depan, dene misi inggih menika tata cara utawi proses kangge nggayuh visi.
Visi gesangipun manungsa inggih menika taqwa, inggih menika njagi dhiri kangge tetep gesang midherek aturaning Allah, kanthi nindak-aken dhawuhipun lan nebihi awisanipun. Dene misi gesangipun manungsa inggih menika ngibadah, inggih gesang ing saklebetipun bimbingan piwucal agaminipun Allah, kanthi midherek aturan-ipun ingkang sampun kaparingaken dening Rasulullah saw.
Ma’asyiral Muslimin rahimakumullah.
Kangge mujudaken visi lan misi kasebat, kita saget ngagem tigang tembung minangka kunci inggih menika : niat ikhlas, dipun lampahi kanthi taat, lan nindak-aken amalan kanthi kabisan ingkang paling sae
.
Sepisan, niat ikhlas keranten Allah
Allah paring piwucal bilih kita sedaya kedah mbudidaya saben ngamal tumindak kedah ikhlas, namung kangge pados ridhanipun Allah:
وَمَا أُمِرُوا إِلَّا لِيَعْبُدُوا اللَّهَ مُخْلِصِينَ لَهُ الدِّينَ حُنَفَاء وَيُقِيمُوا الصَّلَاةَ وَيُؤْتُوا الزَّكَاةَ وَذَلِكَ دِينُ الْقَيِّمَةِ ﴿٥﴾
“kamangka umat manungsa ora didhawuhi kejaba mung supaya padha ngumawula ing Allah kanthi tulus ikhlas , nindak-ake dhawuhing agama kanthi bener; njejegake shalat, mbayar zakat. Kang mengkono iku minangka agama kang lempeng” (Qs. Al Bayyinah: 5)
Kaping kalih, tansa taat dhumateng Allah lan rasul, amrih saget nggayuh kabegjan gesang
وَأَطِيعُواْ اللّهَ وَرَسُولَهُ إِن كُنتُم مُّؤْمِنِينَ ﴿١﴾
“lan padha ta`at-a ing ngersane Allah lan Rasul-e yen sira temen anggone dadi wong kang iman” (Qs. Al-Anfal: 1)
Tujuan ingkang sae kedah dipun lampahi kanthi cara lan sarana ingkang sae; mboten kepareng nglanggar aturaning syariat Allah lan Rasulullah SAW. Umpami, yen kepengin dados sugi bandha, pramila kedah nyambut damel kanthi jujur lan midherek aturan. Mboten keparengn ngapusi, manipulasi, nyuap (mbeseli) , korupsi, merampas hak tiyang sanes lan sanesipun.
Ma’asyiral Muslimin rahimakumullah.
Kaping tiga, tumindak kanthi kabisan ingkang paling sae; miangka perlambang prestasi ingkang saget ndamel bombing (marem) ing ngersanipun Allah SWT.
وَلِكُلٍّ وِجْهَةٌ هُوَ مُوَلِّيهَا فَاسْتَبِقُواْ الْخَيْرَاتِ أَيْنَ مَا تَكُونُواْ يَأْتِ بِكُمُ اللّهُ جَمِيعاً إِنَّ اللّهَ عَلَى كُلِّ شَيْءٍ قَدِيرٌ ﴿١٤٨﴾
“Lan tumrap saben umat duwe kiblat kang dheweke ngadhep (dadi tujuan). Mula sira padha age-age gegancangan ing tumindak kabecikan. Ana ngendi wae sira dumunung, mangka gusti Allah mesthi bakal ngumpulake sira kabeh (ing dina kiamat). Saktemene Allah Maha Kuwasa atase sakabehe perkara.” (Qs. Al Baqarah: 148)
Sampun ngantos kita kapilut ing gebyaring gesang kadonyan ingkang asring ndamel lena.
Kadospundi wonten kathah tiyang sugih bandha, nanging mboten dipun blanja-aken kangge perkawis ingkang luhur minulya; nanging justru namung kangge pamer lan ngumbar kesugihan, umuk kemonceran gesang; gadhah ngilmu namung kangge ngetingalaken sipat kongas lan gumedhenipun, nggadhahi jabatan namung kangge dolanan kewenangan.
Ing saklebeting gesang menika kita sedaya dipun jurung supados saget ngamal lan nggayuh pakaryan ingkang paling sae – menapa kemawon ingkang kuwawi kita gayuh, selaras kaliyan panggaotan (bidang keahlian) utawi profesi lan kesagahan piyambak-piyambak. Saklajengipun menika sedaya dipun dadosaken minangka lantaran anggen kita ngumawula dhumateng Allah swt. Sadayaning perkawis ingkang saget kita gayuh lan kuwawi dipun kumpulaken ing saklebeting gesangmenika: (sae awujud bandha, ngelmu, kalenggahan, kasantosan utawi wujuding badan; sedaya lillahi ta’ala, namung kangge ngupadi ganjaran lan ridhanipun Allah ta’ala.Mekaten khutbah menika, mugi-mugi Allah paring pitedah dhumateng kita amrih tansah saget lumampah ing margining agami kanthi leres, lan kita katebihna saking gegayuhan gesang kadonyan ingkang kebak godhaning hawa nepsu lan ndamel sasar. A-miin
أَقُوْلُ قَوْلِي هَذَا فَأَسْتَغْفِرُ اللهَ الْعَظِيْمَ، إِنَّهُ هُوَ الْغَفُوْرُ الرَّحِيْمُ
Khutbah II
الْحَمْدُ لِلَّهِ الَّذِي هَدَانَا لِهَذَا وَمَا كُنَّا لِنَهْتَدِيَ لَوْلَا أَنْ هَدَانَا اللَّهُ لَقَدْ جَاءَتْ رُسُلُ رَبِّنَا بِالْحَقِّ وَنُودُوا أَنْ تِلْكُمُ الْجَنَّةُ أُورِثْتُمُوهَا بِمَا كُنْتُمْ تَعْمَلُونَ
أَشْهَدُ أَنْ لاَ إِلَهَ إِلاَّاللهُ وَحْدَهُ لاَ شَرِيْكَ لَهُ وَأَشْهَدُ أَنَّ مُحَمَّداً عَبْدُهُ وَرَسُوْلُهُ. اَللَّهُمّ صَلِّ وَسَلِّمْ عَلى مُحَمّدٍ وَعَلى آلِهِ وِأَصْحَابِهِ وَمَنْ تَبِعَهُمْ بِإِحْسَانٍ إِلَى يَوْمِ الدّيْن
اَمَّا بَعْدُ : فَيَااَ يُّهَاالنَّاسُ !! اِتَّقُوااللهَ تَعَالىَ. وَذَرُوالْفَوَاحِشَ مَاظَهَرَوَمَابَطَنْ. وَحَافِظُوْاعَلىَ الطَّاعَةِ وَحُضُوْرِ الْجُمْعَةِ وَالْجَمَاعَةِ. وَاعْلَمُوْااَنَّ اللهَ اَمَرَكُمْ بِأَمْرٍ بَدَأَ فِيْهِ بِنَفْسِهِ. وَثَنَّى بِمَلاَئِكَةِ قُدْسِهِ. فَقَالَ تَعَالىَ وَلَمْ يَزَلْ قَائِلاًعَلِيْمًا: اِنَّ اللهَ وَمَلاَئِكَتَهُ يُصَلُّوْنَ عَلىَ النَّبِىْ يَاَ يُّهَاالَّذِيْنَ آمَنُوْاصَلُّوْاعَلَيْهِ وَسَلِّمُوْا تَسْلِيْمًا
اَللَّهُمَّ صَلِّ عَلَى مُحَمَّدٍ وَعَلَى آلِ مُحَمَّدٍ كَمَا صَلَّيْتَ عَلَى إِبْرَاهِيْمَ وَعَلَى آلِ إِبْرَاهِيْمَ، إِنَّكَ حَمِيْدٌ مَجِيْدٌ. وَبَارِكْ عَلَى مُحَمَّدٍ وَعَلَى آلِ مُحَمَّدٍ كَمَا بَارَكْتَ عَلَى إِبْرَاهِيْمَ وَعَلَى آلِ إِبْرَاهِيْمَ، إِنَّكَ حَمِيْدٌ مَجِيْدٌ
اللهُمَّ اغْفِرْ لِلْمُسْلِمِيْنَ وَالمسْلِمَاتِ وَالمؤْمِنِيْنَ وَالمؤْمِنَاتِ الأَحْيَاءِ مِنْهُمْ وَالأَمْوَاتِ إِنَّكَ سَمِيْعٌ قَرِيْبٌ مُجِيْبُ الدَّعْوَةِ
اللَّهُمَّ إِنَّا نَعُوذُ بِكَ مِنَ البَرَصِ ، وَالجُنُونِ ، والجُذَامِ ، وَسَيِّيءِ الأسْقَامِ .رَبَّنَا هَبْ لَنَا مِنْ أَزْوَاجِنَا وَذُرِّيَّاتِنَا قُرَّةَ أَعْيُنٍ وَاجْعَلْنَا لِلْمُتَّقِينَ إِمَامًا
اللَّهُمَّ إنَّا نَسْأَلُكَ الهُدَى ، والتُّقَى ، والعَفَافَ ، والغِنَى
رَبَّنَا آتِنَا فِي الدُّنْيَا حَسَنَةً وَفِي الْآخِرَةِ حَسَنَةً وَقِنَا عَذَابَ النَّارِ
وَآخِرُ دَعْوَانَا أَنِ الْحَمْدُ لله رَبِّ الْعَالَمِيْنَ