Naskah Khutbah BAHASA JAWA Jumat Dewan Dakwah BantulEdisi 041/Tahun II/2022
Ingin mendapatkan materi Khutbah Jumat?
🟢 Group WhatsApp 1️⃣
https://chat.whatsapp.com/GYrsFLncgFdBP0NyCIGYe2
🟢 Group WhatsApp 4️⃣ : https://chat.whatsapp.com/HuyMTmy9wVn2vdG1HRQMSw
🔵 Naskah lengkap dari awal bisa dibuka di Channel Telegram : https://t.me/khutbah_DDII_Bantul
💻 Naskah lengkap dari awal : https://drive.google.com/drive/folders/11ZcffhlMqe-KdNXEshz1UUOhQ4Ik132l?usp=sharing
Suwargamu ing Omahmu
Dening : Ust Syamsul Munawar
Khutbah I
أَلْحَمْدُ لِلَّهِ الَّذِي أَنزَلَ السَّكِينَةَ فِي قُلُوبِ الْمُؤْمِنِينَ لِيَزْدَادُوا إِيمَاناً مَّعَ إِيمَانِهِمْ وَلِلَّهِ جُنُودُ السَّمَاوَاتِ وَالْأَرْضِ وَكَانَ اللَّهُ عَلِيماً حَكِيماً
أَشْهَدُ أَنْ لَا إِلَهَ إِلَّا الله وَحْدَهُ لَا شَرِيْكَ لَهُ، وَأَشْهَدُ أَنَّ سَيِّدَنَا مُحَمَّدًا عَبْدُهُ وَرَسُوْلُهُ،
اَللَّهُمَّ صَلِّ عَلَى سَيِّدِنَا مُحَمَّدٍ وَعَلَى آلِهِ وَصَحْبِهِ وَمَنْ تَبِعَهُمْ بِإِحْسَانٍ إِلَى يَوْمِ الدِّيْنِ،
فَيَا أَيُّهَا الْحَاضِرُوْنَ، اِتَّقُوْا الله حَقَّ تُقَاتِهِ وَلَا تَمُوْتُنَّ إِلَّا وَأَنْتُمْ مُسْلِمُوْنَ،
يَا أَيُّهَا النَّاسُ قَدْ جَاءتْكُم مَّوْعِظَةٌ مِّن رَّبِّكُمْ وَشِفَاء لِّمَا فِي الصُّدُورِ وَهُدًى وَرَحْمَةٌ لِّلْمُؤْمِنِينَ
Ma’asyiral muslimin rahimakumullah,
Salah satunggaling kanugrahan saking gusti Allah tumrap kawulanipun inggih menika rumah tangga (gesang bebrayan). Allah ta’ala paring jodhoning gesang ingkang luhur lan kinurmat tumrap umat manungsa ingkang minangka tandha kuwaosipun Allahamrih saget ndadosaken tentreming penggalih, nggayuh asih katresnan, sarta minangka sesandhangan lan kanca ing salebeting nglampahi gesang bebrayan. Allah Subhanahu wa Ta’ala paring firman :
وَمِنْ ءَايَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً إِنَّ فِي ذَلِكَ لأَيَاتٍ لِّقَوْمٍ يَتَفَكَّرُونَ
“Lan ing antarane tandha kuwasane Allah, yaiku Panjenengane nyipta tumrap sira jodho sangka jinis-ira dhewe, amrih sira pada antuk katentreman ing ati, lan mawujud ing antaraning sira rasa asih tresna. Satemene ing perkara kang mengkono iku yekti minangka tandha kuwasane Allah tumrap umat kang mikir.” (QS. Ar-Ruum :21)
Ma’asyiral muslimin rahimakumullah,
Manungsa nggadhahi fitrah ingkang awujud dhemen (remen) dhumateng lawan jinisipun, ingkang kanthi margining nikah pramila bakal pikantuk sarana kangge nyekapi raos katresnan, katentreman gesang lan welas asih. Ing salebeting gesang bebrayan, satunggaling kakung bakal manggihaken papan kangge ngaso kanthi kinurmat lan ngraosaken kantentreman penggalih sasampunipun nyambut damel. Piyambakipun saget mberat sumpeg-ing penggalih lan raos buneging gesang. Piyambakipun saget nyampir-aken “bot-repoting” gesang kanthi nyawang esem ingkang manis, praupan ingkang sumringah, utawi tetembungan ingkang alus merak ati saking jejering wanita ingkang dados jodhonipun; solah bawa ingkang alus, lan panggulawenthah ingkang rumaket. Sedaya menika bakal piananggih ing jejering garwa ingkang ngancani salebeting bebrayan gesang, sigaraning nyawa lan minangka ibu saking para putranipun.
Mekaten ugi, setunggaling wanita, baka; manggihaken pangayoman ing satengahing kulawarga ingkang kebak raos bingah lan gesng kanthi raos aman lan tentrem. Bale griya ngkang minangka idhaman bakal dados papan dunung lan lahiripun putra wayah ingkang shaleh ing salebeting panggulawenthahing tiyang sepuh ingkang kebak kawibawan lan tresna asih, kathah kawigatosan ingkang nuwuhaken katentreman ing batin.
Lan Allah Subhanahu wa Ta’ala paring dhawuh:
وَاللهُ جَعَلَ لَكُم مِّنْ أَنفُسِكُمْ أَزْوَاجًا وَجَعَلَ لَكُم مِّنْ أَزْوَاجِكُمْ بَنِينَ وَحَفَدَةً وَرَزَقَكُم مِّنَ الطَّيِّبَاتِ أَفَبِالْبَاطِلِ يُؤْمِنُونَ وَبِنِعْمَتِ اللهِ هُمْ يَكْفُرُونَ
“Allah wis ndadek-ake tumrap sira jodhomu sangka jinis-ira dhewe, lan ndadek-ake sangka dheweke sira pinaringan turun anak lan putu; lan peparing rejeki ing sira kanthi becik. Mangka apa jalarane wong-wong padha iman marang kang bathil lan kufur marang nikmat peparinge Allah.” (QS. An-Nahl: 72)
Ma’asyiral muslimin rahimakumullah,
Piwucal Islam ndadosaken kulawarga minangka nyawijinipun kathah kesaenan, asih tresna lan gesang ingkang selaras; sarta kados dene minangka pager ingkang njagi kemaslahatan, raos asih tresna lan guyub rukun. Saben anggota kulawarga saget dados patuladhan ing salebeting nindak-aken dharmaning gesang, netepi hak lan kuwajiban. Dhedahsar mekaten pramila raos kabingahan ing salebeting bebrayan kulawarga saget dipun bangun kanthi aish tresna lan tulung-tinulung.
Tali gesang bebrayan (nikah) minangka janji prasetya ingkang teguh ﴿ مِّيثَاقاً غَلِيظاً ﴾, pilar ingkang bakoh, lan pondasi ingkang lebet. Perkawis menika Hal ini dijelaskan dalam ayat di atas oleh firman Allah Subhanahu wa Ta’ala :
لِّتَسْكُنُوا إِلَيْهَا
“Supaya sira tansah antuk ketentreman ing dheweke.” (QS. Ar-Ruum :21)
Bab menika ngetingalaken bilih woten raos katentreman ing salebeting gesang bebrayan ingkang paling inggil, kadoos ingkang dipun sebatakn ing ayat sanes:
هُنَّ لِبَاسٌ لَّكُمْ وَأَنتُمْ لِبَاسٌ لَّهُنَّ
“Dheweke (bojonira) iku minangka sandhangan tumrap sira, lan sira uga minangka sandhangan tumrap dheweke.” (QS. Al-Baqarah :187)
Ma’asyiral muslimin rahimakumullah,
Al-Qur’an nyebat kanthi endahing tata basa perkawis pesrawunganing garwa kakung lan estri, kados dene sesambunganipun tiyang kaliyan sandhangan (klambi) ingkang dipun agem. Menapa wonten ingkang langkung caket tumrap tiyang tinimang agemanipun? Lan kita mangertos, bilih pigunanipun sandhangan menika ngayomi dados aling-aling saking panas lan adhem, minangka pepaes (pacakan) sahingga pantes utawi endah dipun sawang. Mekaten menika pigunanipun gesang bebrayan garwa kakung-estri, paring pengayoman lan mepaes dhiri kangge nggayuh kabingahan. Nikah mboten namung dados tali gesang kadonyan ingkang ukuranipun arta bandha, hawa nepsu kados sato kewan, nanging ikatan ruhani lan manah ingkang mulya.
Garwa kakung lan estri kedah saget nampi menapa kemawon kekiranganipun, nglenggana ing kalepatan lan ngapunten khilafipun. Awit sinten kemawon menika mesthi kedunungan sipat: lali lan luput. Kados dene sanepan: “kesandhung ing rata, kebentus ing tawang.”
Monggo sageta kita srawung lan nggulawentah kulawarga kanthi ing sae. Sinten tiyang ingkang paling nggadhahi hak dipun srawungii kanthi akhlak bebuden ingkang sae – tinimbang garwa panjenengan, ingkang tansah ngrencangi lan nyartani gesang panjenengan? Piyambakipun tansah mbiyantu lan nyekapi hajat gesang panjenengan ing saben dintenipun.
وَعَاشِرُوهُنَّ بِالْمَعْرُوفِ فَإِن كَرِهْتُمُوهُنَّ فَعَسَى أَن تَكْرَهُوا شَيْئًا وَيَجْعَلَ اللهُ فِيهِ خَيْرًا كَثِيرًا
“Lan srawungana dheweke (bojomu) kanthi samurwat. Banjur menawa sira ora seneng ing dheweke, (mangka paryoga sira sabar) jalaran bisa wae sira ora seneng ing sawijining perkara,, kamangka Allah wis ndadek-ake ing dheweke kabecikan kang akeh.” (QS. An-Nisa’ :19)
Ma’asyiral muslimin rahimakumullah,
Salajengipun para garwa kakung kedah paring kawigatosan lan hak estri kanthi leres, lan sampun ngantos ndamel “telantar” lan lampah zhalim (aniaya).
وَلَهُنَّ مِثْلُ الَّذِي عَلَيْهِنَّ بِالْمَعْرُوفِ وَلِلرِّجَالِ عَلَيْهِنَّ دَرَجَةٌ وَاللهُ عَزِيزٌ حَكِيمٌ
“Lan para wanita nduweni hak kang samurwat kelawan kewajibane miturut cara kang ma’ruf (becik). Nanging para bojo lanang, nduweni saderajat kaluwihan tinimbang bojo wadone. Lan Allah Maha AGung lan Maha Wicaksana.” (QS. Al-Baqarah :228)
Saking ‘Aisyah r.a. bilih Rasulullah SAW ngendika,
خَيْرُكُمْ خَيْرُكُمْ لِأَهْلِهِ وَأَنَا خَيْرُكُمْ لِأَهْلِي
“Sabecik-becike sira yaiku wong kang paling becik tumrap kulawargane, lan Ingsun (nabi) minangka wong kang paling becik marang kulawargaku.” (Riwayat al-Tirmidzi 3895)
Ma’asyiral muslimin rahimakumullah,
Kagem para kakung, sumangga kanthi dhedhasar takwa dhumateng Allah kita tumindak sae nggulawenthah garwa lan kulawarga. Katindakno kuwajiban kita minangka “kepala keluarga” midherek syaruat, paring beblanjan nafkah lan nyekapi sandhang pangan lan papanmidherek kekiyatan kita.
أَسْكِنُوهُنَّ مِنْ حَيْثُ سَكَنتُم مِّن وُجْدِكُمْ وَلاَتُضَآرُّوهُنَّ لِتُضَيِّقُوا عَلَيْهِنَّ
“Weneh-ono papan bojo (kulawarganira ing papan sira dumunung miturut kedaya kekuatanira, lan sira ojo nggawe susah (rekasa) ing dheweke sahingga ndadek-ake atine nelangsa.” (QS.At-Thalaq :6)
لِيُنفِقْ ذُو سَعَةٍ مِّن سَعَتِهِ وَمَن قُدِرَ عَلَيْهِ رِزْقُهُ فَلْيُنفِقْ مِمَّآ ءَاتَاهُ اللهُ لاَيُكَلِّفُ اللهُ نَفْسًا إِلاَّ مَآءَاتَاهَا
“Prayogane wong kang saguh weneh nafkah miturut kesanggupane. Lan wong kang cupet rejekine supaya menehi nafkah sangka bandha kang diparingake dening Allah ing dheweke. Allah ora paring sesanggan marang kawula kejaba mung samurwat kelawan apa kang diparingake.” (QS. At-Thalaq :7)
Rasulullah SAW paring dhawuh:
مَا أَطْعَمْتَ نَفْسَكَ فَهُوَ لَكَ صَدَقَةٌ وَمَا أَطْعَمْتَ وَلَدَكَ فَهُوَ لَكَ صَدَقَةٌ وَمَا أَطْعَمْتَ زَوْجَتَكَ فَهُوَ لَكَ صَدَقَةٌ وَمَا أَطْعَمْتَ خَادِمَكَ فَهُوَ لَكَ صَدَقَةٌ
“Bandha kang sirabalanja-ake kanggo mangan kapetung minangka sedekah tumrap sira. Lan pangan kang sira wenehake marang anak, iku dadi sedekah. Lan pangan kang sira wenehake ing bojo, uga dadi sedekah. Mengkono uga pangan kang sira wenehake ing rewang, iku uga dadi sedekah. (HR Ahmad 4: 131)
Ma’asyiral muslimin rahimakumullah,
Para garwa kakung supados jumeneng minangka kepala keluarga ingkang saget dados priyayi idaman ingkang grapyak lan dados “kebanggaan” saking garwa estri lan putra-putrinipun. Sampun ngantos ketingal minangka jejering tiyang ingkang dipun ajrihi dening kulawarganipun.
Minangka jejering garwa kakung, sampun ngantos namung remen dhawuh (printeh) lan nglarang. Nggaadhahi watak kejem lan sawenng-wenang. Mboten pinter srawung, grapyak, angel paring ngapunten, gampil muntab lan cengkiling (kodo). Saben ngucap kados dene raja ingkang kedah menang lan tansah dipun pireng. Saben tymindak kanthi lampah kasar lan tanpa petung. Ketingal ‘sluntrut, mbesengut’ lan mboten nate purun mbiyantu pedamelan garwa ing nggriya. Saben mlebet ing griya tansah ‘nggrundel, misuh’. Nalika medal griya tansah cubriya. Mboten ngetingalaken raos katresnan utawi alusing solah bawa. Garwa lan putra saestu ketingal sengsara – nelangsa, jinja (kandos pinanggih kewan galak ingkang bakal nadhah kalamangsa).
Kados pundi caranipun nyipta suasana kaendahan lan kabingahan ing salebeting kulawarga? Prayogi sanget para kakung ingkang minangka kepala keluarga saget jumeneng minangka pemimpin ingkang dipun tresnani, mboten dipun ajrihi.
Kalenggahanipun garwa kakung (suami) saestu ageng ing satengahing kulawarga, kados dhawuhing Allah ing Al-Qur’an:
الرِّجَالُ قَوَّامُونَ عَلَى النِّسَاء بِمَا فَضَّلَ اللّهُ بَعْضَهُمْ عَلَى بَعْضٍ وَبِمَا أَنفَقُواْ مِنْ أَمْوَالِهِمْ
“Jejering priya iku minangka pemimpin (tetunggul) tumrap wanita, jalarana Allah wis paring kaluwihan ing priya tinimbang wanita, lan jalaran priya nduweni kuwajiban weneh nafkah sangka saperangan bandhane.” (Qs. An Nisa’ : 34)
Kalenggahan minangka pemimpin inggih kedah ndamel raos kabingahan (karaharjan) ing kulawarga. Linangkung yen emut kados pundi rumiyin nalikane nembe badhe ndamel janji ing awal nikah mbangun gesang bebrayan, garwa kakung sampun sagah badhe nresnani garwa putri lan badhe paring kabingahan lair-batos. Sampun ngantos janji kasebat namung dados impen lajeng ical musna kados namung minangka “andheg ing pangamun-amun” utawi fatamorgana.
Ma’asyiral muslimin rahimakumullah,
Kabingahan menika dipun gayuh menawi saget nyekapi kabetahan pokok gesang ing kulawarga. Temtu kemawon menika mbetahaken ikhtiar lan pangurbanan saking pihak kakung minangka suami lan kepala keluarga. Piyambakipun kedah saget dados satunggaling tiyang ingkang dipun piandel lan ndamel ‘mongkog’
Saestunipun, nalika jejer kakung nikah klaiyan wanita, menika mendhet kuwajiban tanggeljawab pangayoman saking bapakipun, lan pindhah dados seanggan ing pundhakipun kakung minangka suami. Tegesipun pangayoman lan sesanggan kuwajiban saking jejer bapak tumrap si-wanita wiwit bayi dumugi ing diwasa salajengipun pindhah dipun tampi ing garwa kakung. Malah mboten namung ceka[ ing babagan gesang kadonyan, namung ngantos dumugi jaminan supados mbenjang dipun ajak lumbebet ing suwarga.
Wontenipun raos tanggeljawab ingkang agung, linangkung yen emut dhumateng janji minangka garwa kakung (suami) ing sangajengipun wali lan kathaing saksi, pramila samesthinipun mboten bakal kelampah wontenipun “penelantaran istri, zhalim (aniaya) dhateng kulawarga utawi anak putu. Mboten badhe kelampah wontenipun “kekerasan dalam rumah tangga” (KDRT), sebab sedaya bakal dipun pundhut tanggeljawabipun ing ngersanipun Allah SWT. Malah, senadyan jejeripun suami istri menikka sampun sami sepuhipun (usia lanjut), samesthenipun justru tansaya ngrembaka lan lebet raos welas asihipun.
Ma’asyiral muslimin rahimakumullah,
Satunggaling pemimpin rumah tangga bakal tansah mbudidaya kulawarga menika dados wasilaj lan tujuan ing saben labuh labet lan pangurbanan anggenipun makarya sadanguning gesang. Piyambakipun badhe tansah ndedonga:
رَبَّنَا هَبْ لَنَا مِنْ أَزْوَٰجِنَا وَذُرِّيَّٰتِنَا قُرَّةَ أَعْيُنٍ وَٱجْعَلْنَا لِلْمُتَّقِينَ إِمَامًا
“Dhuh gusti Allah, mugi paduka paring nugraha ing kawula garwa lan putra-wayah ingkang tansah ndamel remen ing peningal, lan kadadosno kawula minangka pemimpin tumrap tiyang ingkang takwa,” (QS al-Furqan: 74).
Sampun jamak lumrahipun saben toyang kepengin yen kulawarganipun saget ketingal sae, saget ningali garwa lan putra wayahipun ketingal sae lan ndamel remen. Nanging sampun ngantos kesupen, bilih dhiri pribadhinipun ugi supados saget ketingal sae lan dados ngremenaken saben dipun sawang dening anggota kulawrga sanesipun.
Ma’asyiral muslimin rahimakumullah,
Tandha satunggaling tiyang tresna dhumateng garwanipun, inggih mennika yen piyambakipun nggadhahi “dedikasi” tumrap kulawarga, ketingal mboten ing wujudipun nuntut hak dhumateng kulawarga, nanging justru kedah diipun buktek-aken kanthi tekadipun kagem “ngetingalaken sumbang sih, pangurbanan, lan ‘berjuang’ kanthi lampah menapa kemawon kangge nyekapi kabetahan kulawarga ingkang dipun tresnani menika. Sanes kanthi lampah ‘posisif’ ingkang sarwa ketingal kumawoso, watak ‘kereng’ lan sarwa mbatesi solah bawa lan hak-ipun kulawarga.
Suasana ingkang harmonis, kanthi paring kesempatan sedaya kulawarga nyata-aken pemanggihipun sacara timbal-balik, sinartan solah bawa ingkang nedahaken raos asih tresna kangge nggayuh kemaslahatan kulawrga saestu minangka “suwarga” ingkang bakal ndamel raos bingah kagem sedaya anggota kulawarga. Ucapan lan tumindak tansah saget dipun jagi. Mboten wonten suwanten “jeritan, bengokan’ utawi tindak lampah ingkang kasar. Menika sedaya dipun lambari raos asih tresna lan tanggeljawab. Kulawarga badhe tansah dados papan ingkang ndamel kangen, kepengin tansah makempal, nyawiji lan manungalipun sedaya brayat. Saat ingkang kados mekaten menika kulawarga sampun dados “suwarga” tumrap kita.
Mekaten atur khutbah ing siang meika, mugi manfaat tumrap kita sedaya. Amiin
أَقُوْلُ قَوْلِي هَذَا َوَاسْتَغْفِرُ اللهَ لِي وَلَكُمْ وَلِسَائِرِ المُسْلِمِيْنَ إِنَّهُ هُوَ السَمِيْعُ العَلِيْمُ
Khutbah II
اَلْحَمْدُ للهِ رَبِّ اْلعَالَمِيْن، وَالعَاقِبَةُ لِلْمُتَّقِيْنَ، وَلاَ عُدْوَانَ إِلاَّ عَلَى الظَّالِمِيْنَ، أَشْهَدُ أَنْ لاَ إِلَهَ إِلاَّاللهُ وَحْدَهُ لاَ شَرِيْكَ لَهُ وَأَشْهَدُ أَنَّ مُحَمَّداً عَبْدُهُ وَرَسُوْلُهُ. اَللَّهُمّ صَلِّ وَسَلِّمْ عَلى مُحَمّدٍ وَعَلى آلِهِ وِأَصْحَابِهِ وَمَنْ تَبِعَهُمْ بِإِحْسَانٍ إِلَى يَوْمِ الدّيْن
فَياَ اَيُّهَا النَّاسُ اِتَّقُوااللهَ فِيْمَا أَمَرَ وَانْتَهُوْا عَمَّا نَهَى وَزَجَر, وَاعْلَمُوْا أَنَّ اللهَ أَمَرَكُمْ بِأَمْرٍ بَدَأَ فِيْهِ بِنَفْسِهِ وَثَـنَى بِمَلآ ئِكَتِهِ المُسَبِّحَةِ بِقُدْسِهِ,
فَقَالَ تَعَالىَ: اِنَّ اللهَ وَمَلاَئِكَتَهُ يُصَلُّوْنَ عَلىَ النَّبِىْ يَاَ يُّهَاالَّذِيْنَ آمَنُوْاصَلُّوْاعَلَيْهِ وَسَلِّمُوْا تَسْلِيْمًا
اللَّهُمَّ صَلِّ عَلَى مُحَمَّدٍ وَعَلَى آلِ مُحَمَّدٍ، كَمَا صَلَّيْتَ عَلَى إِبْرَاهِيْمَ وَعَلَى آلِ إِبْرَاهِيْمَ، وَبَارِكْ عَلَى مُحَمَّدٍ وَعَلَى آلِ مُحَمَّدٍ، كَمَا بَارَكْتَ عَلَى إِبْرَاهِيْمَ وَعَلَى آلِ إِبْرَاهِيْمَ، فِي العَالَمِيْنَ إِنَّكَ حَمِيْدٌ مَجِيْدٌ،.
اَللَّهُمَّ اغْفِرْ لِلْمُؤْمِنِيْنَ وَ الْمُؤْمِنَاتِ وَ الْمُسْلِمِيْنَ وَ الْمُسْلِمَاتِ اَلْأَحْيَاءِ مِنْهُمْ وَ الْأَمْوَاتِ اِنَّكَ سَمِيْعٌ قَرِيْبٌ مُجِيْبُ الدَّعْوَاتِ وَ قَاضِيَ الْحَاجَاتِ.
اَللَّهُمَّ رَبَّنَا لَا تُزِغْ قُلُوْبَنَا بَعْدَ اِذْهَدَيْتَنَا وَ هَبْلَنَا مِنْ لَدُنْكَ رَحْمَةً اِنَّكَ اَنْتَ الْوَهَّابُ
رَبَّنَا هَبْ لَنَا مِنْ اَزْوَاجِنَا وَ ذُرِّيَّتِنَا قُرَّةَ اَعْيُنٍ وَ اجْعَلْنَا لِلْمُتَّقِيْنَ اِمَامًا.
رَبَّنَا اَتِنَا فِى الدُّنْيَا حَسَنَةً وَ فِى الْآخِرَةِ حَسَنَةً وَ قِنَا عَذَابَ النَّارِ
عِبَادَ الله! اِنَّ الله يَأْمُرُ بِالْعَدْلِ وَ الْإِحْسَانِ وَ اِيْتَاءِ ذِى الْقُرْبَى وَ يَنْهَى عَنِ الْفَحْشَاءِ وَ الْمُنْكَرِ وَ الْبَغْىِ يَعِظُكُمْ لَعَلَّكُمْ تَذَّكَّرُوْنَ فَاذْكُرُوْا الله الْعَظِيْمَ يَذْكُرْكُمْ وَ اشْكُرُوْهُ عَلَى نِعَمِهِ يَزِدْكُمْ وَ لَذِكْرُ اللهِ اَكْبَرُ وَ اللهُ يَعْلَمُ مَا تَصْنَعُوْنَ