DEDALANE NGGAYUH TAKWA – Khutbah Jumat Bahasa Jawa

Naskah Khutbah Jumat BAHASA JAWA Dewan Dakwah BantulEdisi 006/Tahun III/2023

Ingin mendapatkan materi Khutbah Jumat?

🟢 Group WhatsApp 3️⃣ : https://chat.whatsapp.com/LLH6iduekXrCVt4tsszX7I

🔵 Naskah lengkap dari awal bisa dibuka di Channel Telegram : https://t.me/khutbah_DDII_Bantul

💵 Rekening Donasi Dakwah :
Bank Syariah Indonesi 899 0000 997
atas nama : Dewan Dakwah Bantul

DEDALANE NGGAYUH TAKWA
Dening : Ust. Saiful Bahri

Khutbah I

اَلْحَمْدُ لِلّهِ رَبِّ الْعَالَمِيْنَ نَحْمَدُهُ وَنَسْتَعِيْنُهُ وَنَسْتَغْفِرُهُ وَنَتُوْبُ إِلَيْهِ وَنَعُوْذُ بِاللهِ مِنْ شُرُوْرِ أَنْفُسِنَا وَسَيِّئَاتِ أَعْمَالِنَا مَنْ يَهْدِ اللهُ فَلاَ مُضِلَّ لَهُ وَمَنْ يُضْلِلْ فَلاَ هَادِيَ لَهُ
اَشْهَدُ اَنْ لاَ اِلهَ اِلاَّ اللهُ وَحْدَهُ لاَ شَرِيْكَ لَهُ وَاَشْهَدُ اَنَّ مُحَمَّدًا عَبْدُهُ وَرَسُوْلُهُ
وَالصَّلاَةُ وَالسَّلاَمُ عَلَى نَبِيِّنَا مُحَمَّدٍ وَعَلَى ءَالِهِ وَاَصْحَابِهِ وَمَنْ تَبِعَهُ اِلَى يَوْمِ الدِّيْنِ
فَيَاعِبَادَ اللهِ : اُوْصِيْكُمْ وَنَفْسِي بِتَقْوَ اللهِ وَطَاعَتِهِ لَعَلَّكُمْ تُفْلِحُوْنَ. قَالَ اللهُ تَعَالَى فِى الْقُرْآنِ الْكَرِيْمِ: يَااَيُّهَا الَّذِيْنَ اَمَنُوا اتَّقُوا اللهَ حَقَّ تُقَاتِهِ وَلاَ تَمُوْتُنَّ اِلاَّ وَاَنْتُمْ مُسْلِمُوْنَ
يَا أَيُّهَا الَّذِيْنَ ءَامَنُوا اتَّقُوا اللهَ وَقُوْلُوْا قَوْلاً سَدِيْدًا. يُصْلِحْ لَكُمْ أَعْمَالَكُمْ وَيَغْفِرْ لَكُمْ ذُنُوْبَكُمْ وَمَنْ يُطِعِ اللهَ وَرَسُوْلَهُ فَقَدْ فَازَ فَوْزًا عَظِيْمًا. أَمَّا بَعْدُ؛

Ma’asyiral muslimin, rahimakumullah ..
Tembung takwa, miturut Profesor Hamka ing kitab tafsir Al-Azhar, saking Bahasa Arab “wiqayah” ingkang ateges njagi, utawi ngrumat.. Njagi sesambungan ngabektinipun dhumateng Allah SWT. Njagi amrih mboten ngantos kejeblos ing tumindak ingkang nistha lan mboten dipun ridho-i dening Allah.

Njagi ing sedaya dhawuhipun supados sanget ngleksana-aken, njagi amrih mboten kejrumus ing tumindak ingkang kebak rereget lan kacintrakan. Kanthi mekaten, takwa maknanipun mboten saget namung awujud raos ajrih dhumateng Allah. Nanging pancen ajrih menika sak-perangan alit kemawon saking suraosipun takwa menika.

Miturut professor Hamka, ing salebeting takwa menika ngemu suraos asih lan tresna, pangajeng-ajeng, lan raos kuwatir, tawakal, ridha, lan sabar. Takwa mibangka cak-cakanipun iman lan amal saleh. Malah ugi, ing tembung takwa menika ngemu teges ‘wani’. Utawi mboten ajrih, mlincur utawi gigrik ngadhepi perkawis.

Takwa mujudaken dhawuhipun Allah tumrap sedaya umat manusngsa kados pangendikanipun ing al-Qur’an:

يَا أَيُّهَا النَّاسُ اعْبُدُواْ رَبَّكُمُ الَّذِي خَلَقَكُمْ وَالَّذِينَ مِن قَبْلِكُمْ لَعَلَّكُمْ تَتَّقُونَ ﴿٢١﴾
“He umat manungsa, padha nyembah-a sira ing Gusti Allah pangeranira, kang Panjenengane wis nyipta ing sira lan wong wong sadurunge sira kabeh, amrih sira dadi kawula kang padha takwa” (Qs. Al-Baqarah: 21)

Ma’asyiral muslimin, rahimakumullah ..
Ing salebeting rekadaya nggayuh takwa lan amrih tansah saget dipun jagi kesaenanipun, wonten saperangan cara ingkang saget kita lampahi, ing anatawisipun inggih menika Muhasabah, Muraqabah, Mujahadah lan Mu’aqabah:

1️⃣ Muhasabah, inggih menika sacara pribadi nindakaken petangan (mulat salira) ing atasing lampah gesang ingkang dipun alami. Saumpami : magepokan kaliyan umur, kathahing nikmat ingkang sampun dipun tampi, lan sepinten agengipun lampah taat nindak-aken dhawuhing agami.

Tiyang ingkang nindakaken muhasabah baka dados toying ingkang wicaksana, saget ndunungaken (mapanaken) sedaya perkawis ing gesang kanthi pratitis. Jalaran nalar lan manahipun saestu dipun agem kangge metangaken sae utawi awon, bathi utawi rugi, bejo utawi cilaka ing gesang menika.

2️⃣ Muraqabah, inggih menika nuwuhaken raos ‘eling’ bilih kita sedaya menika tansah ing salebeting pengawasan saking Allah, bilih Panjenenganipun minangka dzat ingkang tansah mriksani lanmidhanget ing saben tumindak kita.

Menawi tiyang saget mujudaken muraqabah saking Allah, pramila piyambakipun bakal tansah ngamal tumindak ingkang sae, mboten bakal tuwuh penggalih utawi sedya kagem nglanggar (nrabas) aturan menapa kemawon. Menapa malih kok ngantos sengaja ngrancang badhe tumindak awon lan lampah dosa.

Ma’asyiral muslimin, rahimakumullah ..
3️⃣ Mujahadah, inggih menika nuwuhaken tekad ingkang kiyat kangge “berjuang” anggenipun ngleksanaaken dhawuhipun Allah. Saestu anggenipun mbudidaya nindak-aken kuwajiban minangka satunggaling kawula. Nalika kita saget nindak-aken satunggaling lampah taat ing agami, pramila saestnipun badhe tuwuh raos bingah ing salebeting manah.

4️⃣ Mu’aqabah, inggih menika paring ‘ukuman’ tumrap dhiri pribadi kanthi nindakaken amal esaenan ingkang tikel matikel nalikanipun kita leno utawi teledor saking nindak-aken kuwajiban agami, utawi kebacut tumindak lepat.

Saumpami: mboten saget nderek sholat berjamaah, pramila kita piyambak saget “ngukum dhiri pribadi” kanthi infak ingkang jumlahipun sampun dipun temtok-aken. Utawi kanthi maos Al-Qur’an 1 juz. Utawi saget ugi wujud amal kesaenan sanesipun minangka cara paring pemut ing dhiri pribadi amrih kita tetep lumampah ing margi ingkang leres.

Wonten satunggaling kisah ingkang dipun lampahi dening Sahabat Umar bin Khatab. Nalika piyambakipun tindak ing kebun kurma kagunganipun ingkang saestu subur. Awit saking ndamel remen lan bingahipun, piyambakipun ngantos supe ing wekdal. Nailka wangsul ing nggriya, jebul sampun ketinggalan nindak-aken shalat ashar jama’ahan.

Pramila piyambakipun lajeng ngucap:
“Inna lillahi wa inna ilahi roji’un. Aku ketinggalan shalat jamaah.”
Minangka ijolipun lan dados ukuman kagem pribadhinipun, piyambakipun ngucap “Seksenono, wiwit saiki aku nyedekah-ake kebunku kanggo wong-wong miskin,”

Ma’asyiral muslimin, rahimakumullah ..
Meniko-lah sekawan (4) cara ingkang saget dipun agem kangge nggayuh lan njagi raos takwa. Kanthi takwa menika, Allah badke paring dhumateng kita margi kangge mbengkas ruwet rentenging gesang, lan badhe pinaringan sawernining margi ingkang gampil ngadhepi perkawis gesang kita. Allah paring dhawuh ing bab kautamanipun takwa:

وَمَن يَتَّقِ اللهَ يَجْعَل لَّهُ مَخْرَجًا
“Sapa wae kawula kang takwa ing ngersane Allah, temen Panjenengane Allah bakal paring ing dheweke uwal saka pepeteng urip”. (Q.S. Ath-Thalaq: 2).

وَمَن يَتَّقِ اللهَ يَجْعَل لَّهُ مِنْ أَمْرِهِ يُسْرًا
‘Lan sapa wae kawula kang takwa ing ngersane Allah, temen Panjenengane Allah bakal paring gampang ing saben-saben urusane”. (Q.S. Ath-Thalaq: 4).

Ma’asyiral muslimin, rahimakumullah ..
Takwa ingkang kados mekaten sanget wigatos kagem ngadhepi sawernaning kawontenan ingkang mboten ajeg, kados ing wekdal samenika sedaya ngalami owah gingsir mboten saget dipun singkiri ing sedaya perkawis gesang.

Allah SWT paring pemut ing kita sedaya bilih sangu ingkang paling sae kagem ngadhepi sedaya perkawis inggih menika namung takwa:

وَتَزَوَّدُواْ فَإِنَّ خَيْرَ الزَّادِ التَّقْوَى وَاتَّقُونِ يَا أُوْلِي الأَلْبَابِ
“Lan sira kabeh padha golek-a sangu, dene sak-becik-becike sangu yaiku takwa; lan sira kabeh padha takwa-a ing ngersaning-Sun Allah, he – wong-kang padha nduweni akal pikiran” (Qs. Al Baqarah: 197)

Mekaten khutbah Jumat ing siang menika mugi manfaat. Sumangga kita tansah njagi iman lan takwa amrih tetep istiqomah, sahingga minangka pribadi, kulawarga lan masyarakat Indonesia tansah pikantuk margi ingkang gampil kagem uwal saking mapinten-pinten perkawis gesang, kanthi rahmat lan ridhonipun Allah SWT. A-miin

بَارَكَ اللهُ لِي وَلَكُمْ فىِ اْلقُرأنِ اْلعَظِيْمِ، وَنَفَعَنِي وَإِيَاكُمْ بِمَافِيْهِ مِنَ الاٰيَاتِ وَالذِّكْرَ اْلحَكِيْمِ، وَ تَقَبَّلَ مِنيِّ وَ مِنْكُمْ تِلاَوَتَهُ إِنَّهُ هُوَ الَسمِيْعُ اْلعَلِيْمُ

Khutbah II

اَلْحَمْدُ ِللهِ وَكَفٰى، وَسَلاَمٌ عَلٰى عِبَادِهِ الَّذِيْنَ اصْطَفٰى. أَشْهَدُ أَنْ لاَ إِلهَ إِلَّا اللهُ وَحْدَهُ لاَ شَرِيْكَ لَهُ. وَأَشْهَدُ أَنّ مُحَمّدًا عَبْدُهُ وَرَسُوْلُهُ لاَ نَبِيَّ بَعْدَهُ.
اَللهُمَّ صَلِّ وَسَلّمْ عَلٰى سَيِّدِنَا مُحَمّدٍ وَعَلى آلِهِ وِأَصْحَابِهِ وَمَنْ تَبِعَهُمْ بِإِحْسَانٍ إِلَى يَوْمِ الدّيْن
أَمَّا بَعْدُ؛ عِبَادَ اللهِ، أُوْصِيْكُمْ وَإِيَّايَ بِتَقْوَى اللهِ، فَاتَّقُوا اللهَ حَقَّ تُقَاتِهِ وَلاَ تَمُوْتُنَّ إِلاَّ وَأَنتُمْ مُّسْلِمُوْنَ
إِنَّ اللهَ وَمَلاَئِكَتَهُ يُصَلُّوْنَ عَلَى النَّبِيِّ يَا أَيُّهَا الَّذِيْنَ آمَنُوْا صَلُّوْا عَلَيْهِ وَسَلِّمُوْا تَسْلِيْمًا.
اَللّهُمَّ صَلِّ وَ سَلِّمْ عَلَى سَيِّدِنَا وَ حَبِيْبِنَا مُحَمَّدٍ وَّعَلَى اَلِه وَ سَائِرِ الصَّحَابَةِ وَ التَّابِعِيْنَ وَمَنْ تَبِعَهُمْ بِاِحْسَانِ اِلَى يَوْمِ الدِّيْنِ
اللَّهُمَّ اغْفِرْ لِلْمُؤْمِنِيْنَ وَالْمُؤْمِنَاتِ، وَالْمُسْلِمِيْنَ وَالْمُسْلِمَاتِ، الأَحْيَاءِ مِنْهُمْ وَالأَمْوَاتِ، إِنَّكَ سَمِيْعٌ قَرِيْبٌ مُجِيْبُ الدُّعَاءِ.
اَللَّهُمَّ أَصْلِحْ لَنَا دِيننَا اَلَّذِي هُوَ عِصْمَةُ أَمْرِنَا وَأَصْلِحْ لَنَا دُنْيَا نَا اَلَّتِي فِيهَا مَعَاشنَا وَأَصْلِحْ لَنَا آخِرَتَنَا اَلَّتِي إِلَيْهَا مَعَادنَا وَاجْعَلْ اَلْحَيَاةَ زِيَادَةً لَنَا فِي كُلِّ خَيْرٍ وَاجْعَلْ اَلْمَوْتَ رَاحَةً لَنَا مِنْ كُلِّ شَرٍّ.
رَبَّنَا ظَلَمْنَا أَنْفُسَنَا وَإِنْ لَمْ تَغْفِرْ لَنَا وَتَرْحَمْنَا لَنَكُوْنَنَّ مِنَ الخَاسِرِيْنَ.
رَبَّنَا آتِنَا في الدُّنْيَا حَسَنَةً وَفي الآخِرَةِ حَسَنَةً وَقِنَا عَذَابَ النَّارِ.