Naskah Khutbah Jumat BAHASA JAWA Dewan Dakwah BantulEdisi 022/Tahun III/2023
Ingin mendapatkan materi Khutbah Jumat?
🟢 Group WhatsApp 2️⃣ : https://chat.whatsapp.com/JwOZ6ZelLUx5BTam0cYhFn
🔵 Naskah lengkap dari awal bisa dibuka di Channel Telegram : https://t.me/khutbah_DDII_Bantul
MINANGKANI TIMBALANE ALLAH
Dening : Ust. Abdul Hakim
Khutbah I
اَلْحَمْدُ لِلَّهِ الَّذِيْ كَانَ بِعِبَادِهِ خَبِيْرًا بَصِيْرًا، تَبَارَكَ الَّذِيْ جَعَلَ فِي السَّمَاءِ بُرُوْجًا وَجَعَلَ فِيْهَا سِرَاجًا وَقَمَرًا مُّنِيرًا
أَشْهَدُ أَنْ لَا إِلَهَ إِلَّا الله وَحْدَهُ لَا شَرِيْكَ لَهُ، وَأَشْهَدُ أَنَّ سَيِّدَنَا مُحَمَّدًا عَبْدُهُ وَرَسُوْلُهُ،
اَللَّهُمَّ صَلِّ وَسَلِمْ وَبَارِكْ عَلَى نَبِيِنَا مُحَمَّدٍ وَعَلَى اَلِهِ وَأَصْحَابِهِ أَجْمَعِيْنَ , وَمَنْ تَبِعَهُ بِاِحْسَانٍ اِلَى يَوْمِ الدِيْنَ
أَمَّا بَعْدُ؛ عِبَادَ اللهِ، أُوْصِيْكُمْ وَإِيَّايَ بِتَقْوَى اللهِ، فَاتَّقُوا اللهَ حَقَّ تُقَاتِهِ وَلاَ تَمُوْتُنَّ إِلاَّ وَأَنتُمْ مُّسْلِمُوْنَ
يَا أَيُّهَا الَّذِينَ آَمَنُوا اتَّقُوا الله وَقُولُوا قَوْلًا سَدِيدًا، يُصْلِحْ لَكُمْ أَعْمَالَكُمْ وَيَغْفِرْ لَكُمْ ذُنُوبَكُمْ وَمَنْ يُطِعِ الله وَرَسُولَهُ فَقَدْ فَازَ فَوْزًا عَظِيمًا
وَلِلّهِ عَلَى النَّاسِ حِجُّ الْبَيْتِ مَنِ اسْتَطَاعَ إِلَيْهِ سَبِيلاً وَمَن كَفَرَ فَإِنَّ الله غَنِيٌّ عَنِ الْعَالَمِينَ
Ma’asyiral Muslimin rahimakumullah
Kita minangka tiyang muslim temtu nggadhahi pepinginan saget nyampurna-aken keislaman kita ingkang dipun wujudaken kanthi nindak-aken sedaya rerangkening rukun Islam ingk cacahipun gangsal, wiwit saking: syahadat, sholat, puasa, zakat lan haji.
Ibadah haji minangka panyampurnaning rukun Islam ingkang gangsal. Dereng sampurna Islam kita menawi mboten nggadhahi raos tinimbalan kagem nindak-aken ibadah haji. Pramila, samesthinipun manah kita umat Islam bakal tansah nggadhahi raos kangen, kapan bakal pikantuk kesempatan saget tindak ziarah ing tanah suci.
Saat menika kita sampun mlebet ing wulan Dzulqa’dah, minangka salah satunggaling wulan kagem ibadah haji. Kaum Muslimin saking sedaya papan ing alam ndonya bakal nindak-aken rukun Islam ingkang agung menika. Allah subhanahu wata’ala sampun paring dhawuh dhumateng kanjeng Nabi Ibrahim a.s. supados nimbali sedaya umat manungsa amrih nindak-aken ibadah haji kanthi ziarah ing tanah suci, kados dhawuh firman-ipun:
وَأَذِّن فِى ٱلنَّاسِ بِٱلْحَجِّ يَأْتُوكَ رِجَالًا وَعَلَىٰ كُلِّ ضَامِرٍ يَأْتِينَ مِن كُلِّ فَجٍّ عَمِيقٍ
“Lan timbalana umat manusia kanggo nindak-ake haji, yekti dheweke bakal tumeka ing papanira iki kanthi mlaku, lan numpak unta kang kuru, teka sangka sakabehing papan kang adoh dununge,” (Qs al Hajj: 27)
Ma’asyiral Muslimin rahimakumullah
Ibadah haji minangka ibadah ingkang ngimpun antawispun amal ati, lisan lan anggota badan. Ibadah menika kedah linambaran raos ikhlas lan sabar, lisan ingkang tansah ngucap kalimat thayyibah lan amalan raga awujud Thawaf lan Sa’i, mbalang Jumrah lan sanes-sanesipun.
Salajengipun, Ibadah haji menika kedah pawitan sehatipun raga lan penggalih; ugi betah ragat (arta bandha). Kathah wujud pengurbanan ingkang kedah dipun lampahi kagem kaum Muslimin amrih saget nindak-aken ibadah ingkang mekaten agung menika.
Awit saking menika, Allah Ta’ala sampun nyawiskaen piwales (ganjaran) ingkang paling sae tumrap tiyang ingkang kasil nindak-aken ibadah haji kanthi leres dan ikhlas, inggih menika suwarga. Rasulullah SAW paring sabda:
وَالْحَجُّ الْمَبْرُورُ لَيْسَ لَهُ جَزَاءٌ إِلَّا الْجَنَّةُ
“lan haji mabrur ora ono liya piwales ganjarane kejaba suwarga“. (Muttafaq ‘alaih)
Allah Maha Paring Piwales ing saben lampah pangurbanan ingkang kita tibdak-aken, lan malah langkung ageng tinimbang ingkang sampun kita tindak-aken. Jalaran tiyang ingkang mekaten sampun ngagungaken syar-syiar agaminipun Allah.
ذَلِكَ وَمَن يُعَظِّمْ شَعَائِرَ اللَّهِ فَإِنَّهَا مِن تَقْوَى الْقُلُوبِ ﴿٣٢﴾
“Mengkono (dhawuhe Allah). Lan sopo wong kang ngagungake syiar-syiar Allah, mangka yekti iku tuwuh sangka ati kang takwa.” (Qs. Al Hajj: 32)
Ma’asyiral Muslimin rahimakumullah
Tiyang ingkang ing salebeting manah dumunung raos iman lan tresna dhumateng Allah ta’ala, mesthi kagungan panjangka lan kangen saget pianggih (sowan) dhumateng Allah, lan bakal mbudidaya kanthi sakatogipun daya kakiyatan kagemminangkani dhawuh timbalanipun menika. Allah ta’ala paring dhawuh:
وَلِلّهِ عَلَى النَّاسِ حِجُّ الْبَيْتِ مَنِ اسْتَطَاعَ إِلَيْهِ سَبِيلاً وَمَن كَفَرَ فَإِنَّ الله غَنِيٌّ عَنِ الْعَالَمِينَ
“Nindakake haji minangka kuwajiban umat manungsa marang Allah, yaiku (tumrap) wong kang mampu nempuh lakune tumuju Baitullah; Sapa wong kang selak (nyingkur) (saka kuwajiban haji), mangka satemene Allah Maha Sugih (ora mbutuhake) sangka saisine alam ndonya.” (Qs Ali Imran: 97)
Ibadah haji minangka silaturahmi akbar tahunan umat Islam. Sedaya nggadhahi maksud ingkang sami amrih saget dados kawulanipun Allah ingkang taat, senadyan saking asal ingkang mboten sami, menapa ingkang sipatipun: bangsa, budaya, drajat kalenggahan (status social), profesi lan sanes-sanesipun. Sedaya mboten wonten ingkang langkung inggil, kejawi raos iman takwa; kadosdene dhawuhipun Rasulullah shallallahu ‘alaihi wasallam:
لَا فَضْلَ لِعَرَبِيٍّ عَلَى أَعْجَمِيٍّ إِلَّا بِالتَّقْوَى
“Ora ana kamulyan tumrap wong Arab ngluwihi marang dudu Arab, kejaba kanthi takwa” (HR Abu Nu’aym dalam Hilyah al-Auliya’)
Ma’asyiral Muslimin rahimakumullah
Ing tanah suci sedaya jamaah haji sami tulung tinulung ing salebeting kesaenan lan takwa. Ing papan kasebat bakal ketingal kanthi gamblang kados pundi makna lan ajinipun pasedherekan sarta drajat martabat ingkang sami ing antawisipun sesami kaum muslimin.
Para jamaah haji sedaya nglepas pakaian padintenanipun piyambak lan dipun gantos kanthi pakaian ihram ingkang langkung mirip kaliyan kain kafan kagem mayit. Sedaya sami maos laimat talbiyah:
لَبَّيْكَ اللّٰهُمَّ لَبَّيْكَ لَبَّيْكَ لَا شَرِيْكَ لَكَ لَبَّيْكَ إِنَّ الْحَمْدَ وَالنِّعْمَةَ لَكَ وَالْمُلْكَ لَا شَرِيْكَ لَكَ
“Kawula sowan ngestok-aken dhawuh timbalan paduka, dhuh Gusti Allah. Kawula sowan dhumateng Paduka. Mboten wonten tetandhingan tumrap Paduka, kawula ngestok-aken timbalan Paduka. Saestu sedaya puji lan nikmat, lan sedaya panguwaos menika namung kagungan Paduka Allah, mboten wonten tetandhingan tumrap Paduka.”
Umat Islam saking sedaya papan ing ngalam ndonya sami dhateng, namung kagem mbuktek-aken raos iman lan tresnanipun shumateng Allah. Umat Islam menika salaipun saking mawerni-werni kalangan masyarakat; wonten ingkang petani, buruh, pedagang alit, pegawai, ngantos pejabat utawi trah ing bangsawan menapa dene konglomerat.
Ma’asyiral Muslimin rahimakumullah
Sumangga kita tansah mbudidaya nambah kakiyatan kita lan kagungan panjangka saget minangkani dhawuh timbalanipun Allah kanthi lampah cecawis ingkang sak-sae-saenipun. Sinambi nenggo wekdal samangke pinaringan kesempatan kagem nindak-aken ibadah haji; kita saget pepacak kados pundi kita sedaya anggenipun nindak-aken dhawuh-dhawuh timbalanipun Allah ing padintenan, kados dene: ibadah shalat fardhu, zakat, infak sedekah, amar ma’ruf nahi munkar; sarta amal shaleh sanesipun ingkang kathah sanget wujudipun.
Mekaten ugi ibadah sanes ingkang mbetahaken ragat ingkang kathah, kados dene kurban lan umrah, menapa kita sampun rumaos tinimbalan kagemnindak-aken? Menapa kita sampun masang niyat, kapan bakal dipun lampahi? Sedaya menika betah niyat lan tekad ingkang kiyat.
Kita samesthinipun tansah mbudidaya kagem nambah lan mbebecik kualitas ibadah kita, kadosdene donga ingkang dipun tuntunaken dening Rasulullah SAW:
اللَّهُمَّ أَعِنِّى عَلَى ذِكْرِكَ وَشُكْرِكَ وَحُسْنِ عِبَادَتِكَ
“Dhuh Gusti Allah, mugi Paduka paring pitulung ing kawula amrih saget tansah dzikir (emut)-Paduka, tansah syukur dhumateng Paduka, lan saget nambah sae anggen kawula ngibadah dhumateng Paduka.” (HR. Abu Daud lan Ahmad, shahih)
Mekaten atur khutbah Jum’at ing siang menika, mugi-mugi sedaya jamaah haji ing taun menika pinaringan lampah ingkang gampil salebetipun nindak-aken sedaya rerangken ibadah haji, lan saget nggayuh drajat haji ingkang mabrur. Salajengipun kita sedaya ingkang dumugi saat menika dereng piraningan kesempatan tindak haji, mugi ing wekdal candhakipun dipun paringi margi ingkang gampil kagem minangkani dhawuh timbalanipun Allah SWT menika kanthi sak sae-saenipun. Amiin.
بَارَكَ اللهُ لِي وَلَكُمْ فيِ القُرْآنِ العَظِيْمِ، وَنَفَعَنيِ وَإِيَّاكُمْ بِمَا فِيْهِ مِنَ اْلآياَتِ وَالذِّكْرِ الحَكِيْمِ وَتَقَبَّلَ مِنيِّ وَمِنْكُمْ تِلاَوَتَهُ َإِنَّهُ هُوَ السَّمِيْعُ العَلِيْمُ.
Khutbah II
الْحَمْدُ لِلّٰهِ رَبِّ الْعَالَمِيْنَ، وَبِهِ نَسْتَعِيْنُ عَلَى أُمُوْرِ الدُّنْيَا وَالدِّيْنِ، أَشْهَدُ أَنْ لاَ إِلَهَ إِلاَّ اللهُ وَحْدَهُ لاَ شَرِيْكَ لَهُ وَأَشْهَدُ أَنَّ مُحَمِّدًا عَبْدُهُ وَرَسُوْلُهُ، اَللَّهُمَّ صَلِّ وَسَلِّمْ عَلَى نَبِيِّنَا مُحَمَّدٍ وَعَلَى آلِهِ وَصَحْبِهِ وَمَنْ تَبِعَهُمْ بِإِحْسَانٍ إِلَى يَوْمِ الدِّيْنِ
أَمَّا بَعْدُ؛ عِبَادَ اللهِ، أُوْصِيْكُمْ وَإِيَّايَ بِتَقْوَى اللهِ، فَاتَّقُوا اللهَ حَقَّ تُقَاتِهِ وَلاَ تَمُوْتُنَّ إِلاَّ وَأَنتُمْ مُّسْلِمُوْنَ
إِنَّ اللهَ وَمَلاَئِكَتَهُ يُصَلُّوْنَ عَلَى النَّبِيِّ يَا أَيُّهَا الَّذِيْنَ آمَنُوْا صَلُّوْا عَلَيْهِ وَسَلِّمُوْا تَسْلِيْمًا.
اللَّهُمَّ صَلِّ عَلَى مُحَمَّدٍ وَعَلَى آلِ مُحَمَّدٍ، كَمَا صَلَّيْتَ عَلَى إِبْرَاهِيْمَ وَعَلَى آلِ إِبْرَاهِيْمَ، وَبَارِكْ عَلَى مُحَمَّدٍ وَعَلَى آلِ مُحَمَّدٍ، كَمَا بَارَكْتَ عَلَى إِبْرَاهِيْمَ وَعَلَى آلِ إِبْرَاهِيْمَ، فِي العَالَمِيْنَ إِنَّكَ حَمِيْدٌ مَجِيْدٌ،
اللَّهُمَّ اغْفِرْ لِلْمُؤْمِنِيْنَ وَالْمُؤْمِنَاتِ، وَالْمُسْلِمِيْنَ وَالْمُسْلِمَاتِ، الأَحْيَاءِ مِنْهُمْ وَالأَمْوَاتِ، إِنَّكَ سَمِيْعٌ قَرِيْبٌ مُجِيْبُ الدُّعَاءِ.
اللَّهُمَّ إِنَّا نَسْأَلُكَ الْهُدَى وَالتُّقَى وَالعَفَافَ وَالغِنَى.
اَللَّهُمَّ أَصْلِحْ لَنَا دِيننَا اَلَّذِي هُوَ عِصْمَةُ أَمْرِنَا وَأَصْلِحْ لَنَا دُنْيَا نَا اَلَّتِي فِيهَا مَعَاشنَا وَأَصْلِحْ لَنَا آخِرَتَنَا اَلَّتِي إِلَيْهَا مَعَادنَا وَاجْعَلْ اَلْحَيَاةَ زِيَادَةً لَنَا فِي كُلِّ خَيْرٍ وَاجْعَلْ اَلْمَوْتَ رَاحَةً لَنَا مِنْ كُلِّ شَرٍّ.
اللَّهُمَّ اجْعَلْ حَجًّا مَبْرُوْرًا وَ سَعْيًا مَشْكُوْرًا وَ ذَنْبًا مَغْفُوْرًا
رَبَّنَا ظَلَمْنَا أَنْفُسَنَا وَإِنْ لَمْ تَغْفِرْ لَنَا وَتَرْحَمْنَا لَنَكُوْنَنَّ مِنَ الخَاسِرِيْنَ.
رَبَّنَا آتِنَا في الدُّنْيَا حَسَنَةً وَفي الآخِرَةِ حَسَنَةً وَقِنَا عَذَابَ النَّارِ.