PANGEJAWANTAHING IMAN TAUHID

Naskah Khutbah Jumat BAHASA JAWA Dewan Dakwah BantulEdisi 024/Tahun III/2023

Ingin mendapatkan materi Khutbah Jumat?

🟢 Group WhatsApp 2️⃣ : https://chat.whatsapp.com/JwOZ6ZelLUx5BTam0cYhFn

🔵 Naskah lengkap dari awal bisa dibuka di Channel Telegram : https://t.me/khutbah_DDII_Bantul

PANGEJAWANTAHING IMAN TAUHID
Dening : Ust. Zainal Abidin

Khutbah I

اَلْحَمْدُ ِللهِ الَّذِي أَرْسَلَ رَسُولَهُ بِالْهُدَى وَدِينِ الْحَقِّ لِيُظْهِرَهُ عَلَى الدِّينِ كُلِّهِ وَكَفَى بِاللَّهِ شَهِيداً
أَشْهَدُ أَنْ لاَ إِلهَ إِلَّا اللهُ وَحْدَهُ لاَ شَرِيْكَ لَهُ. وَأَشْهَدُ أَنّ مُحَمّدًا عَبْدُهُ وَرَسُوْلُهُ لاَ نَبِيَّ بَعْدَهُ.
اَللهُمَّ صَلِّ وَسَلّمْ عَلٰى سَيِّدِنَا مُحَمّدٍ وَعَلى آلِهِ وِأَصْحَابِهِ وَمَنْ تَبِعَهُمْ بِإِحْسَانٍ إِلَى يَوْمِ الدّيْن. اَمَّا بَعْدُ، فَيَا عِبَادَ اللهِ، اُوْصِيْكُمْ وَاَيَّايَ بِتَقْوَى اللهِ وَطَاعَتِهِ لَعَلَّكُمْ تُفْلِحُوْنَ.
يَاأَيّهَا الّذَيْنَ آمَنُوْا اتّقُوا اللهَ حَقّ تُقَاتِهِ وَلاَ تَمُوْتُنَّ إِلاّ وَأَنْتُمْ مُسْلِمُوْنَ
قَالَ اللهُ تَعَالَى فِي الْقُرْآنِ الْكَرِيْمِ، أَعُوْذُ بِاللهِ مِنَ الشَّيْطَانِ الرَّجِيْمِ.
وَمَا أُمِرُوا إِلَّا لِيَعْبُدُوا اللَّهَ مُخْلِصِينَ لَهُ الدِّينَ حُنَفَاء وَيُقِيمُوا الصَّلَاةَ وَيُؤْتُوا الزَّكَاةَ وَذَلِكَ دِينُ الْقَيِّمَةِ

Ma’asyiral Muslimin rahimakumullah,
Iman nggadhahi makna pitados, yakin. Lan ing salebeting iman wonten raos tundhuk midherek (taat) dhumateng sedaya perkawis ingkang ginaris ing piwucalipun. Iman mboten cekap namung kanthi ucapan tetembungan. Iman nembe badhe kabukten nalikanipun setunggaling tiyang ngadhepi pacoban, kadosdene firman pangendikanipun Allah SWT:أَحَسِبَ النَّاسُ أَن يُتْرَكُوا أَن يَقُولُوا آمَنَّا وَهُمْ لَا يُفْتَنُونَ ﴿٢﴾

“Opo umat manungsa duwe pangira menawa dheweke bakal disekarep sawise : “Kawula sampun iman “, kamangka dheweke durung antuk pacoban?” (Qs. Al Ankabut: 2)وَلَقَدْ فَتَنَّا الَّذِينَ مِن قَبْلِهِمْ فَلَيَعْلَمَنَّ اللَّهُ الَّذِينَ صَدَقُوا وَلَيَعْلَمَنَّ الْكَاذِبِينَ ﴿٣﴾

“Lan yekti ingsun Allah wis paring pacoban marang wong-wong sadurunge dheweke, mangka Allah priksa marang wong-wong kang bener ing imane, lan yekti panjenengane priksa wong-wong kang padha cidra.” (Qs Al Ankabut: 3)

Pacoban ing salebeting iman menika wujudipun mawerni-werni, wonten ingkang wujud dhawuh lan awisanipun Allah, wonten ingkang minangka musibah lan bebaya, wonten ugi ingkang minangka kahanan ingkang dipun sandhang (ingkang sae utawi awon)

Ma’asyiral Muslimin rahimakumullah,,
Ing salebeting pepaking kahanan gesang kita dipun dhawuhi amrih tansah nglampahi ing tumindak taat midherek dhumateng Allah lan Rasul. Kados dhawuhipun ing al-Qur’an:وَأَطِيعُواْ اللّهَ وَالرَّسُولَ لَعَلَّكُمْ تُرْحَمُونَ ﴿١٣٢﴾

“Lan sira padha nindakno ta`at ing Allah lan Rasul, supaya sira nampa rahmat.” (Qs. Ali ‘Imran: 132)

Ing ayat sanes dipun tegasaken:
وَمَا آتَاكُمُ الرَّسُولُ فَخُذُوهُ وَمَا نَهَاكُمْ عَنْهُ فَانتَهُوا وَاتَّقُوا اللَّهَ إِنَّ اللَّهَ شَدِيدُ الْعِقَابِ ﴿٧﴾
“Apa wae kang diparingake Rasul marang sira, mangka padha tindakno. Lan apa wae kang dilarang tumrap sira, mangka padha tinggalno; lan padha takwa-o sira marang Allah. Satamene pasiksane Allah iku banget abot.” (Qs Al Hasyr: 7)

Ing salebeting gesangipun tiyang muslim, mboten wonten perkawis ingkang langkung mulya tinimbang iman tauhid (nyawijek-aken) Allah ‘Azza wa Jalla. Mboten wonten ngelmu ingkang paling wigatos (penting) kejawi tauhidullah lan ngelmu perkawis hak-hak ipun Allah Subhanahu wa Ta’ala.

Pramila kuwajiban satunggaling kawula salajengipun inggih menika mbudidaya mangeja-wantahaken iman tauhid menika kanthi sae ing gesang padintenan. Jalaran namung kanthi iman tauhid kita badhe lumebet ing suwarga. Saestu Allah bakal njamin suwarga namung tumrap tiyang ingkang seda ing salebetipun ngugem-ugemi iman tauhid. Rasulullah SAW paring sabda:مَنْ مَاتَ وَهُوَ يَعْلَمُ أَنَّهُ لَا إِلَهَ إِلَّا اللَّهُ دَخَلَ الْجَنَّةَ

“Sapa wong kang mati ing sajroning rasa iman ing kalimat ‘Laa Ilaaha illallah’, mangka dheweke mesthu mlebu ing suwarga.” (HR. Muslim)

Ma’asyiral Muslimin rahimakumullah,
Ing wulan haji lan Qurban saat menika, kasinggihan sanget yen kita sami nuladha mendhet piwucal saking Nabiyullah Ibrahim a.s. Panjenenganipun miangka satunggaling Nabi ingkang saestu pinilih: kados pundi nglampahi lan njagi iman tauhid dhumateng Allah.

Kanjeng Nabi brahim a.s. nampi dhawuh saking Allah SWT supados nyembelih putranipun ingkang sesilih Ismail, lan kekalihipun saestu ngleksana-aken kanthi tulus ikhlas. Dhawuh ingkang mekaten ndamel “gorehing manah” moten ndadosaken “mangro tingal” namung kanthi pawadan katresnan utawi welas asihipun dhumateng putra lan kulawarga.

Kekalihipun mboten ngrerendhe utawi pados pawadan sanes kangge ‘selak’ utawi mlincur saking dhawuh menika. Dhawuhipun Allah menika gamblang, terang terwaca lan mutlak kagem dipun leksana-aken. Pramila mboten nggumunaken menawi kanjeng Nabi Ibrahimm a.s. lajeng nampi gelar minangka khalilullah (inggih menika kekasih ipun Allah).

Patuladhan ingkang mekaten agung kaluhuranipun dipun serat ing Al-Qur’an:إِنَّ إِبْرَاهِيمَ كَانَ أُمَّةً قَانِتاً لِلّهِ حَنِيفاً وَلَمْ يَكُ مِنَ الْمُشْرِكِينَ ﴿١٢٠﴾

“Yekti Ibrahim iku mukudake patuladhan kang tansah mituhu lan taat marang Allah lan kebak ing rasa khusyu’ (tansah bakoh ngugemi tauhidullah) lan dheweke ora nate nyakuto-ake marang Allah.” (QS. An-Nahl:120)

Ma’asyiral Muslimin rahimakumullah,,
Tauhid minangka perkawis wigatos dakwahipun para rasul. Perkawis menika sampun dipun wedhar ing kisah-kisah salebeting Al Qur’an. Tauhid minangka wasiat (piwucal) sepisanan tumrap sedaya kawula. Allah Ta’ala paring firman,وَقَضَى رَبُّكَ أَلاَّ تَعْبُدُواْ إِلاَّ إِيَّاهُ ﴿٢٣﴾

“Lan Allah pangeranira wis paring dhawuh supaya sira ojo nyembah marang sa-liyani panjenengane Allah.” (Qs. Al-Isra’: 23).

Tauhid minangka perkawis ingkang dipun tengenaken (dados prioritas) tumrap tiyang-tiyang shaleh. Nabi shallallahu ‘alaihi wa sallam miwiti dakwah (piwucaling) syiar kanthi dhawuhipun:يَا أَيُّهَا النَّاسُ قُولُوا: لَا إِلَهَ إِلَّا اللهُ، تُفْلِحُوا

“Hei sakabehing umat manungsa, ucapno ‘Laa ilaaha illallah’, sira bakal antuk kabegjan.” (HR. Ahmad lan Ibnu Hibban).

Lan iman tauhid ugi minangka perkawis pungkasan ing salebeting gesangipun tiyang iman. Rasulullah shallallahu ‘alaihi wa sallam paring sabda,لَقِّنُوا مَوْتَاكُمْ لاَ إِلَهَ إِلاَّ اللَّهُ

“Tuntunen (talqin) ing wong kang bakal tumeka pati ing antarane sira kanthi kalimat “laa ilaha illallah” (HR. Muslim)

Ma’asyiral Muslimin rahimakumullah,,
Kanthi iman tauhid, kita tansah dipun emutaken amrih gesang kita samung kangge pados ridhanipun Allah, kados dhawuh firman-ipun:قُلْ إِنَّ صَلاَتِي وَنُسُكِي وَمَحْيَايَ وَمَمَاتِي لِلّهِ رَبِّ الْعَالَمِينَ ﴿١٦٢﴾

“Ucapno: “Saestunipun shalat kawula, ibadah kawula, gesang lan pejah kawula namung kagem pados ridhanipun Allah, ingkang mangerani alam jagad raya,” (Qs. Al An’am: 162)لاَ شَرِيكَ لَهُ وَبِذَلِكَ أُمِرْتُ وَأَنَاْ أَوَّلُ الْمُسْلِمِينَ ﴿١٦٣﴾

“mboten wonten tetandhingan tumrap Allah; lan mekaten menika ingkang dipun dhawuhaken ing kawula, lan kawula minangka tiyang ingkang sepisanan sumarah midherek dhumateng Allah”. (Qs al An’am: 163)

Ayat menika suraosipun njurung ing kita amrih saben wonten dhawuh utawi timbalanipun allah, kita supados age-age utawi gegancangan anggenipun nindak-aken.

Para Nabi lan Rasul sampun dipun uji kanthi katahing pacoban ingkang awrat, dene pacoban tumrap kita minangka jalma manungsa lumrah mboten sami kadosdene pacobanipun para nabi lan rasul menika. Cekap kanthi dhawuh ing salebeting ngibadah, kadosdene: shalat, puasa, zakat lan haji, bakal ketingal bobot bijininipun iman kita ing sangersanipun Allah : kados pundi anggen kita sami nindak-aken dhawuh? ..

Ma’asyiral Muslimin rahimakumullah,,
Ing salebeting kalimat takbir (اللهُ اَكْبَرُ) ing suwanten adzan utawi awal ibadah shalat, kita sami ngakeni maha agung lan kuwaosipun Allah. Ing saat kasbat kita dipun emutaken bilih ing gesang menika ingkang paling agung lan wigatos inggih namung Allah, dene sedaya perkawis sanesipun ing ndonya menika namung alit, lan sedaya mboten penting. Ingkang paling penting lan kedah dipun tengen-aken (minangka prioritas) inggih namung nyembah – ngumawula dhumateng Allah SWT.

Pramila satunggaling muslim ingkang saestu iman tauhid dhumateng Allah (tauhidullah) bakal age-age nindak-aken tibalaning shalat, kados dhawuh firman Allah:يَا أَيُّهَا الَّذِينَ آمَنُوا إِذَا نُودِي لِلصَّلَاةِ مِن يَوْمِ الْجُمُعَةِ فَاسْعَوْا إِلَى ذِكْرِ اللَّهِ وَذَرُوا الْبَيْعَ ذَلِكُمْ خَيْرٌ لَّكُمْ إِن كُنتُمْ تَعْلَمُونَ ﴿٩﴾

“Hei wong-wong kang padha iman, menawa sira wis padha tinimbalan kanggo nindakake shalat ing dina Jum`at, mangka enggal-enggalo sira padha eling marang Allah lan padha tinggalno dedaganganiro. Kang mengkono iku luwih becik tumrap sira yen sira padha mangerteni,” (Qs. Al Jumu’ah: 9)

Nalika kita nundha utawi ngrerendhe nindak-aken sholat, ateges kita sampun mangro tingal dhumateng Allah, jalaran kita langkung nuruti lan midherek perkawis sanes kagem dipun lampahi, tinimbang nindakaken dhawuhipun Allah.

Mekaten ugi, kanthi kalimat talbiyah ing ibadah haji lan umrah, kita sampun dipun paringi piwucal kados pundi latihan kagem nengen-aken dhawuh timbalanipun Allah, pados ridanipun Allah lan saget nengenaken hak Allah tinimbang perkawis sanes-sanesipun.

لَبَّيْكَ اللّٰهُمَّ لَبَّيْكَ لَبَّيْكَ لَا شَرِيْكَ لَكَ لَبَّيْكَ إِنَّ الْحَمْدَ وَالنِّعْمَةَ لَكَ وَالْمُلْكَ لَا شَرِيْكَ لَكَ
Kawula sowan ngestok-aken dhawuh timbalan paduka, dhuh Gusti Allah. Kawula sowan dhumateng Paduka. Mboten wonten tetandhingan tumrap Paduka, kawula ngestok-aken timbalan Paduka. Saestu sedaya puji lan nikmat, lan sedaya panguwaos menika namung kagungan Paduka Allah, mboten wonten tetandhingan tumrap Paduka

Ma’asyiral Muslimin rahimakumullah,,
Saestunipun istiqomah ing salebeting iman tauhid minangka jalaran bakal nampi katentreman lan hidayah ing ndonya lan akhirat. Allah Subhanahu wa Ta’ala paring firman,الَّذِينَ آمَنُواْ وَلَمْ يَلْبِسُواْ إِيمَانَهُم بِظُلْمٍ أُوْلَـئِكَ لَهُمُ الأَمْنُ وَهُم مُّهْتَدُونَ ﴿٨٢﴾

“Wong-wong kang padha iman lan ora nyampur ing imane kanthi laku zhalim (syirik) dheweke iku bakal nampa katentreman lan rasa aman, dheweke iku wong kang padha antuk pituduh.” [Quran Al-An’am: 82].

Sinten tiyangipun ingkang saestu nglampahi lan njagi iman tauhid kanthi sae bakal nampi katntreman gesang lan pitedah (hidayah) ingkang sampurna ing ndonya lan akhirat. Kanthi midherek, taat ing Allah, pramila kita sedaya bakal pikantuk kabegjan, kabingahan lan kamulyan gesang ingkang hakiki. يَا أَيُّهَا الَّذِينَ آمَنُواْ اسْتَجِيبُواْ لِلّهِ وَلِلرَّسُولِ إِذَا دَعَاكُم لِمَا يُحْيِيكُمْ وَاعْلَمُواْ أَنَّ اللّهَ يَحُولُ بَيْنَ الْمَرْءِ وَقَلْبِهِ وَأَنَّهُ إِلَيْهِ تُحْشَرُونَ ﴿٢٤﴾

&“Hei wong-wong kang padha iman, tindakno timbalane Allah lan Rasul nalikane Rasul wis nimbali ing sira tumuju sawijining perkara kang bakal dadi panguripan ing awakira, lan padha sumurupa menawa yekti Allah mbatesi antarane manungsa lan atine, lan yekti ing panjenengane Allah sira bakal dikumpulake bali”_ (Qs. Al Anfal: 24)

Mekaten atur khutbah ing siang menika, mugi-mugi saget dados pemut tumrap kita amrih tansah njagi lan mangejawantahaken raos iman tauhid menika ing sadhengah wekdal, papan lan kawontenan. Mugi mugi Allah SWT tansah paring pitedah, pangayoman lan kekiyatan ing kita saget tansah istiqomah ing margi ingkang jejeg. Amiin.

بَارَكَ اللهُ لِي وَلَكُمْ فيِ القُرْآنِ العَظِيْمِ، وَنَفَعَنيِ وَإِيَّاكُمْ بِمَا فِيْهِ مِنَ اْلآياَتِ وَالذِّكْرِ الحَكِيْمِ وَتَقَبَّلَ مِنيِّ وَمِنْكُمْ تِلاَوَتَهُ َإِنَّهُ هُوَ السَّمِيْعُ العَلِيْمُ.

Khutbah II
الْحَمْدُ لِلّٰهِ رَبِّ الْعَالَمِيْنَ، وَبِهِ نَسْتَعِيْنُ عَلَى أُمُوْرِ الدُّنْيَا وَالدِّيْنِ، أَشْهَدُ أَنْ لاَ إِلَهَ إِلاَّ اللهُ وَحْدَهُ لاَ شَرِيْكَ لَهُ وَأَشْهَدُ أَنَّ مُحَمِّدًا عَبْدُهُ وَرَسُوْلُهُ، اَللَّهُمَّ صَلِّ وَسَلِّمْ عَلَى نَبِيِّنَا مُحَمَّدٍ وَعَلَى آلِهِ وَصَحْبِهِ وَمَنْ تَبِعَهُمْ بِإِحْسَانٍ إِلَى يَوْمِ الدِّيْنِ
أَمَّا بَعْدُ؛ عِبَادَ اللهِ، أُوْصِيْكُمْ وَإِيَّايَ بِتَقْوَى اللهِ، فَاتَّقُوا اللهَ حَقَّ تُقَاتِهِ وَلاَ تَمُوْتُنَّ إِلاَّ وَأَنتُمْ مُّسْلِمُوْنَ
إِنَّ اللهَ وَمَلاَئِكَتَهُ يُصَلُّوْنَ عَلَى النَّبِيِّ يَا أَيُّهَا الَّذِيْنَ آمَنُوْا صَلُّوْا عَلَيْهِ وَسَلِّمُوْا تَسْلِيْمًا.
اللَّهُمَّ صَلِّ عَلَى مُحَمَّدٍ وَعَلَى آلِ مُحَمَّدٍ، كَمَا صَلَّيْتَ عَلَى إِبْرَاهِيْمَ وَعَلَى آلِ إِبْرَاهِيْمَ، وَبَارِكْ عَلَى مُحَمَّدٍ وَعَلَى آلِ مُحَمَّدٍ، كَمَا بَارَكْتَ عَلَى إِبْرَاهِيْمَ وَعَلَى آلِ إِبْرَاهِيْمَ، فِي العَالَمِيْنَ إِنَّكَ حَمِيْدٌ مَجِيْدٌ،
اللَّهُمَّ اغْفِرْ لِلْمُؤْمِنِيْنَ وَالْمُؤْمِنَاتِ، وَالْمُسْلِمِيْنَ وَالْمُسْلِمَاتِ، الأَحْيَاءِ مِنْهُمْ وَالأَمْوَاتِ، إِنَّكَ سَمِيْعٌ قَرِيْبٌ مُجِيْبُ الدُّعَاءِ.
اللَّهُمَّ إِنَّا نَسْأَلُكَ الْهُدَى وَالتُّقَى وَالعَفَافَ وَالغِنَى.
اَللَّهُمَّ أَصْلِحْ لَنَا دِيننَا اَلَّذِي هُوَ عِصْمَةُ أَمْرِنَا وَأَصْلِحْ لَنَا دُنْيَا نَا اَلَّتِي فِيهَا مَعَاشنَا وَأَصْلِحْ لَنَا آخِرَتَنَا اَلَّتِي إِلَيْهَا مَعَادنَا وَاجْعَلْ اَلْحَيَاةَ زِيَادَةً لَنَا فِي كُلِّ خَيْرٍ وَاجْعَلْ اَلْمَوْتَ رَاحَةً لَنَا مِنْ كُلِّ شَرٍّ.
رَبَّنَا ظَلَمْنَا أَنْفُسَنَا وَإِنْ لَمْ تَغْفِرْ لَنَا وَتَرْحَمْنَا لَنَكُوْنَنَّ مِنَ الخَاسِرِيْنَ.
رَبَّنَا آتِنَا في الدُّنْيَا حَسَنَةً وَفي الآخِرَةِ حَسَنَةً وَقِنَا عَذَابَ النَّارِ.l